DILI, 09 agostu 2022 (TATOLI)-–Juventude Hadomi Desportu (JHD) hetan fiar hosi Komandu FALINTIL-Forsa Defeza Timor-Leste (F-FDTL) hodi realiza taxa futsal hodi komemora loron Forsa Armada Libertasaun Nasionál Timor-Leste (FALINTIL) ba da-47.
Taxa futsal FALINTIL ne’e ho tema ‘Dignifika ita-nia heroi FALINTIL feto no mane ne’ebé mak iha tempu okupasaun la goja vida juvenil’.
Reprezentante JBH, Tenente Natalino do Rosário Marques, hateten, objetivu eventu ne’e hodi komemora loron FALINTIL ba da-47, ho nune’e fornese atividade eventuál ba Joven sira hodi prienxe sira-nia tempu, hametin amizade entre juventude, promove talentu iha área futeból liliu futsal no hamoris sentimentu nasionalizmu hodi respeita eroi sira liuhosi envolve iha atividade desportivu.
“Ho Xefe Estadu-Maiór F-FDTL nia desizaun hodi deside fó fiar mai ami Juventude Hadomi Desportu hodi bele realiza eventu ida-ne’e, maski tarde maibé ami esforsu realiza. Eventu ida-ne’e di’ak tebes tanba hodi komemora loron FALINTIL, loron ne’e ita-nia eroi feto no mane sira soe sira-nia isin hodi hetan ukun rasik-an hodi ikus mai ita sira goja independénsia,” Tenente Marques afirma iha ámbitu abertura taxa, iha kampu futsal F-FDTL, Fatuhada, tersa ne’e.
Notísia relevante: Kopa AFF U-19, ekipa TL termina jogu ho mánan kontra Kamboja 4-1
Iha biban hanesan Reprezentante Xefe Estadu-Maiór F-FDTL, Tenente Koronél Armindo Nunes dos Santos, husu ba jogadór sira atu hatudu disiplina hodi nune’e eventu ne’e bele la’o ho di’ak to’o ramata.
“Atu hala’o jogu ne’e ho di’ak presiza disiplina no serbisu hamutuk. Buat rua ne’e iha maka ita la’o ba oin, tanba ne’e disiplina ne’e importante,” nia enkoraja.
Tenente Koronél ne’e husu ba jogadór sira atu labele hanoin tenki manán tanba iha jogu ida tenke iha ida manán no ida tenke lakon, maibé importante mak manán esperiénsia no hatudu disiplina.
Nune’e mós, Reprezentante Sekretaria Estadu Juventude no Desportu (SEJD), João Rodrigues, hateten, eventu ne’e la partisipa hosi feto tanba tempu limitadu tebes. Maski nune’e desportu agora iha progresu boot tanba bainhira kompete iha jogu internasionál sira manán medalla osan mutin no mean, atu kompete iha eventu mundiál sira ne’e mak hahú hosi buak kiik sira hanesan jogu entre klubu nível aldeia, suku no nasionál.
“La’ós ita hanoin atu ba direta partisipa iha eventu rai-li’ur maibé eventu kiik sira nível komunitáriu, klubu, eskolár mak halo selesaun hodi ba kompete iha eventu boot sira iha rai-liur,” nia dehan.
Nune’e, nia husu atu respeita regra no árbitu sira hodi nune’e jogu ne’e bele la’o ho di’ak.
“Tanba partisipante mai mós hosi munisípiu, entaun ne’e di’ak tebes tanba hosi desportu mak halibur ita, bele iha diferente tantu diferente hanoin, karater maibé tanba desportu mak ita hamutuk iha fatin ida, tanba ne’e mak tenke respeita regra,” nia fó hanoin.
Iha abertura ne’e hahú ho jogu hosi klubu Estrela Baguia kontra Quartel General.
Klubu hamutuk 32 ne’ebé partisipa mak hanesan Quartel General, Ministériu Kombatente, Libertasaun Nasionál (MKLN), Ministériu Obra Públika (MOP), Estrela Baguia, Nomat FC, JRL Lereloho FC, IOB FC, BTR-ONE, Ramelau Legend, B’TAL FC, Mua-Cau FC, Tharacerun FC, FC J-ORSF, Andeco FC, AS JERMAN, Mauputar FC, QB-Central, Lafaek FC, São Fran. Xavier, C. Terrestre, AD Samoro, Saralima FC, Ramelau FC, DCP-TL, Coelho FC, Boa Sorte FC, Ua-Kesa FC, Mota Bandeira no Babaken FC.
Orsamentu ba eventu ne’e hamutuk $5.000 resin no prevee ba vensedór sira hamutuk $2.000, nune’e vensedór dahuluk sei simu prémiu osan $1.000.
Jornalista : Antónia Gusmão
Editora : Julia Chataria
