AINARO, 12 agostu 2022 (TATOLI)–Banku Sentrál Timor-Leste (BCTL, sigla portugés), sesta ne’e, hamutuk ho instituisaun finanseiru sira iha Timor-Leste inaugura uma-rua ba família afetadu inundasaun iha loron 04 abril 2021, iha aldeia Hautadu, suku Maubisse, postu administrativu Maubisse, munisípiu Ainaro.
Diretora Asuntu Kooperasaun Relasaun Internasionál BCTL, Raquel Gonçalves da Costa, hateten, inistiva ne’e hanesan halibur ajudu umanitáriu hodi hakma’an maluk sira ne’ebé afetadu dezastre naturál.
“Apoiu ne’ebé ita halo, liuhosi instituisaun finanseira ida-idak organiza ajudu umanitáriu emerjénsia iha maneira oinoin, tanba lei Banku Sentrál la fó dalan atu organiza ajudu instituisionál. Tanba ne’e Banku Sentrál oraganiza nia funsionáriu no parseiru institusionál inklui individuál sira hodi halibur fundu umanitáriu ruma atubele ajuda maluk afetadu,” Diretora hateten iha serimónia inaugurasaun uma-rua iha aldeia Hautadu.
Notísia relevante: BCTL halo abertura torneiu ba modalidade futsal no volleyball
Banku Sentrál loke konta ho naran fundu umanitáriu iha Banku Nasinál Ultramarinu (BNU) no konsege halibur fundu ho montante $16.492,90, ba ajuda emerjénsia família afetadu inundasaun iha Dili no halo uma ba família afetadu dezastre naturál rua iha aldeia Hautadu.
Maski nune’e, BCTL deside la fó osan cash ba vítima sira, maibé sosa materiál no koordena ho autoridade lokál Maubisse, hahú hosi Xefe suku Maubisse, Administradór postu administrativu Maubisse, no Polísia Eskuadra Maubisse hodi entrega direta materiál konstrusaun ba vítima sira ho konkordánsia rai-henek, enkuantu vítima sira mak responsabiliza mão de obra.
Uma rua ne’e ho medida metru 9×7, kuartu tolu sala vizita ida no sala han, inklui hadi’a sanitária, rekonstrui hikas ho totál montante $10.310,65 no kada uma ida ho totál $5.155,33, ne’ebé uma sira ne’e la inklui dapur tanba bazeia ba diskusaun ho benefisiáriu sira katak sira sei uza sira-nia dapur tuan.
Prosesu rekonstrusaun ba uma rua ne’e lori tempu fulan-hitu, hahú hosi novembru 2021 no remata iha juñu 2022, ba benefisiáriu rua hanesan José da Costa no Alberto da Conceição.
Iha biban hanesan, Administradór postu administrativu Maubisse, Claudino Mendonça, agradese ba BCTL tanba bele apoiu ona uma rua ba família afetadu dezastre naturál.
“Dezastre naturál iha loron 04 abril 2021 nu’udar akontesimentu ne’ebé doko ita-nia nasaun tanba situasaun momentu ne’abá lori triste tebes ba ita hotu no família rua, maibé agora hetan ajuda ne’e sira-nia uma rai taka tomak,” nia tenik.
Hanesan Autoridade lokál, nia parte husu ba afetadu dezastre naturál atu uza uma ho di’ak no kuda ai-oan ne’ebé bele proteje rai haleu uma, nune’e bainhira udan boot labele akontese tan dezastre naturál hanesan tinan kotuk ne’e.
Nune’e mós, reprezentante benefisiáriu uma, Adelino Espírito do Santo, lori família nia naran agradese tanba situasaun difisil ida-ne’e bele apoiu uma sira.
“Ami laiha kbiit atu selu apoiu sira maibé ami iha de’it liafuan obrigada no agradese, ba oin ami sei kuidadu uma ne’e ho di’ak,” nia dehan.
Jornalista : Arminda Fonseca
Editora : Julia Chatarina
