AINARO, 12 agostu 2022 (TATOLI)—Komunidade uma-kain 32 iha aldeia Hautadu no Sarlala suku Maubisse, postu administrativu Maubisse, munisípiu, Ainaro, seidauk asesu liña eletrisidade desde restaurasaun independénsia to’o agora.
“Kompañia nasionál ida mai monta ona ai-riin eletrisidade no fiu dada hotu ona iha ami-nia aldeia desde tinan 2014 to’o 2016, maibé atu fornese enerjia elétrika mai ne’e to’o agora seidauk ho razaun kompañia dehan osan atu sosa trafu fornese enerjia elétrika mai ne’e mak seidauk iha,” Komunidade aldeia Hautadu, Domingos de Almeida Magno, hateten iha aldeia Hautadu, sesta ne’e.
Aleinde ne’e, komunidade aldeia Hautadu hasoru difikuldade tanba suku Maubisse liga ba aldeia Hautadu laiha.
“Ami-nia produtu barak hanesan senoura, repollu, no seluk tan, maibé atu lori ba merkadu ne’e mak susar, tanba ami laiha estrada ne’ebé fasilita ami atu lori produtu sira ne’e, entaun ami lori la’o ain to’o ba estrada boot ba merkadu boot bele to’o kilómetru tolu resin,” nia akresenta.
Notísia relevante: EDTL, E.P deside re-anunsia konkursu instala eletrisidade pakote 30
Administradór postu administrativu Maubisse, Claudino Mendonça, hateten, proukupasaun ne’e hato’o ona ba parte relevante maibé seidauk iha resposta.
Nia dehan, iha mós suku Manetu no Manelobas ne’ebé seidauk asesu liña eletrisidade.
“Iha fulan-ida resin liubá ami halo ona proposta ba Eletricidade de Timor-Leste, Empreza Públika (EDTL, E.P) no Institutu Jestaun Ekipamentu, Institutu Públiku (IGE, I.P, sigla portugés) atu haree ba enerjia eletrisidade no mós ba estrada ne’ebé liga mai aldeia Hautadu ne’e rasik no ba fatin sira seluk, maibé ami seidauk hetan resposta,” nia dehan.
Postu adminstrativu Maubisse rasik iha suku hamutuk sia no aldeia 62 ho totál populasaun 26.663.
Antes ne’e, EDTL, E.P loke konkursu eletrifikasaun nasionál hamutuk pakote 30 iha suku 33, hosi totál suku 76 iha territóriu nasionál ne’ebé seidauk asesu ba eletrisidade.
Orsamentu ba projetu eletrifikasaun iha suku 76 ne’ebé seidauk asesu eletrisidade hamutuk millaun $12, ne’ebé prevee ona iha orsamentu tinan 2021.
Jornalista : Arminda Fonseca
Editora : Julia Chatarina
