Governu inaugura no entrega uma ba veteranu dezmobilizadu iha Uatulari

VIQUEQUE, 13 agostu 2022 (TATOLI)—VIII Governu Kopnstitusionál lideradu Primeiru-Ministru, Taur Matn Ruak, liuhosi Xefe Sekretáriu Estadu Asuntu Kombatente Libertasaun Nasionál (SEAKLN), sábadu ne’e, inaugura no entrega uma ba veteranu dezmobilizadu ho grau 24 na’in-rua iha postu adiministrativu Uatulari, munisípiu Viqueque.

Notísia Relevante: Konstrusaun uma veteranu 20-24 seidauk finaliza tanba foin konklui uma hitu

“Ohin ami mai inaugura uma ne’ebé Governu oferese ba ita-nia veteranu dezmobilizadu na’in-rua iha Uatulari. Ha’u reprezenta Governu hakarak husu agradese ba uma-na’in sira tanba konsege finaliza sira-nia mehi konstrui uma nomós konsege realiza programa Governu ninia mehi,” Reprezentante Sekretáriu Estadu Asuntu Kombatente Libertasaun Nasionál (SEAKLN) no Atuál Xefe Gabinete SEAKLN, Albino Carvalho Lelo, hateten ba jornalista sira hafoin ramata inaugura uma, iha suku Macadique, sábadu ne’e.

Tanba, Governu nia mehi atu valóriza no dignifika veteranu sira-ne’ebé luta ba libertasaun ka ukun rasik an Timor-Leste nian, hanesan veteranu sira-ne’ebé mak dezmobilizadu, nune’e mak VIII Governu Konstitusionál aloka orsamentu hodi konstrui uma ba veteranu dezmobilizadu sira iha territóriu nasionál.

“Ita valoriza sira liuhosi osan pensaun veteranu nian no uma ne’ebé dignu ba veteranu sira. Tan ne’e, ita inaugura ona dezmobilizadu uma rua mak uma ida iha suku Macadique no ida seluk iha suku Matahoi,” nia dehan.

Tuir dadús, iha faze dahuluk uma hamutuk unidade 96, faze daruak mak uma hamutuk unidade 21 no uma sira-ne’ebé sei iha prosesu konstrusaun nia laran hamutuk uma unidade 48.

“Veteranu sira-ne’ebé halo sira-nia uma no balun seidauk halo tanba sira mós sei halo hela sira-nia planu ba konstrusaun uma. Ha’u lori Governu nia naran nafatin enkoraja veteranu sira aselera lalais konstrusaun uma tanba ne’e programa Governu nian, atu nune’e ita-nia ezekusaun bele la’o ho di’ak,” nia dehan.

Nia relata, Governu aloka orsamentu ba dezmobilizadu ho montante $40.000.00 ba veteranu kategoria tinan 20-24 no 35000 ne’e ba kategoria veteranu tinan 15-19.

Reprezentante Konsellu Komisaun Nasionál Veteranu, Ilda Maria da Conceição, hateten Governu aloka orsamentu direta ba konta bankaria veteranu sira-nian, depois mak sira konstrui uma maibé veteranu balun hetan ona osan hosi Governu seidauk konstrui uma, nune’e Konsellu Veteranu sei halo monitorizasaun.

“Tanba ne’e, ha’u husu veteranu sira-ne’ebé mak simu ona osan hosi Governu ténke aselera hari’i uma. Tanba osan hosi Governu ne’ebé aloka ba veteranu sira halo uma ne’e tenke hatama relatóriu mak foin Governu tau tan ba faze daruak. Entaun ita la halo hotu ezekusaun la boot, Governu sei ko’a. Tanba ne’e mak ha’u husu veteranu 24 ne’ebé simu ona osan ne’e di’akliu harii  ona uma,” nia dehan.

Iha biban ne’e, benifísiariu veteranu dezmobilazu Manuel Soares (Mau-Lindo) hateten, Governu aloka orsamentu $40.000.00 atu konstrui uma, nune’e tenta konsege mai hari’i tiha uma iha suku Macadique.

“Ha’u agora daudaun sei ativu iha F-FDTL, iha momentu Governu aloka osan hari’i uma ne’e, ha’u deside mai hari’i iha suku Macadique. Molok ha’u hahú konstrusaun uma hasoru difikuldade oioin tanba materiál konstrusaun folin karun. Maibé ha’u tenta halo maske folin materiál karun, ha’u esforsu halo tanba osan ne’ebé Governu fó ne’e ninia intensaun ita atu halo uma. Ikus mai ha’u konsege konstrui uma ida-ne’e ba ha’u-nia oan sira,” nia dehan.

Uma ne’ebé desmovilizadu konstrui ho medida um 11×11 ho montante orsamentu $40.000. hahú prosesu konstrusaun iha tinan 2021 no ramata tinan 2022.

Veteranu Dezmobilizadu ne’ebé sei ativa iha F-FDTL ne’e iha ninia oan hamutuk na’in-hitu.
Enkuantu iha postu Uatulari uma ba veteran dezmobilizadu na’in-rua nian mak finaliza ona ne’ebé ohin Governu ofisiál entrega ba Benefísiariu Manuel Soares (Mau-Lindo) no veteranu dezmobilizadu Afonso Fernandes “La Silu” lokaliza iha suku Matahoi.

Konstrusaun uma veteranu dezmbvilizadu Afonso Fernandes “La Silu” medida uma 14×14. Veteranu ne’e ho ninia oan hamutuk na’in-neen.

Inaugurasaun uma ba veteranu dezmobilizadu na’in-rua ne’e hetan bensaun hosi amu vigáriu parokia Uatulari. Iha serimónia inaugurasaun ne’e hetan partisipa hosi autoridade postu Uatulari no komunidade.

Agradese ba Governu

Iha biban ne’e, veteranu Afonso Fernandes “La Silu” nia oan-mane, Alcino Menezes, hato’o agradesimentu ba VIII Governu Konstritusionál ne’ebé konstrui ona uma ba veteranu dezmobilizadu sira tanba sira-nia dedikasaun iha funu luta ba libertasaun nasionál.

“Ha’u nu’udar oan mane sente kontente no agradese ba Governu ne’ebé oferese ona uma ba veteranu sira. Tanba ne’e, ha’u husu agradese ba Governu apoia orsamentu ba veteranu sira konstrui uma ne’ebé dignu ida-ne’e no Governu valoriza ona veteranu sira luta ba libertasaun,” nia dehan.

Veteranu sira merese duni hetan uma dignu tanba sira gasta sira-nia vida joven iha ai-laran, nune’e agora VIII Governu Konstitusionál sira hodi kria uma ba sira hodi hela iha laran.

“Nu’udar veteranu nia oan, ha’u husu nafatin ba Governu atu tau matan ba veteranu sira to’o tempu sira ramata sira-nia moris iha mundu. Nune’e, sira bele moris kontente ho família sira mak ba fali mundu seluk, tau matan ba sira-nia jerasaun sira,” nia hateten.

Governun mós presiza tau matan no dignifika feto faluk no oan ki’ak sira-ne’ebé sei moris iha susar nia laran.

Notísia Relevante: MAKLN seidauk bele halo fiskalizasaun ba konstrusaun uma veteranu 20-24

Jornalista : Vitorino Lopes da Costa

Editór       : Cancio Ximenes