KAPITÁL, NASIONÁL

AMD sei muda negosiante faan karreta iha estrada públiku

AMD sei muda negosiante faan karreta iha estrada públiku

Negosiante faan karreta iha fatin ka estrada públiku besik Kaza Eurepeia tasi-ibun. Imajen Tatoli/Nelia Fernandes.

DILI, 15 agostu 2022 (TATOLI)—Diretór Servisu Munisipál Jestaun Merkadu no Turizmu, Arthur Henriques, informa Autoridade Munisípiu Dili (AMD) sei koordena ho Polisia Nasionál Timor-Leste (PNTL) atu oinsá muda sai negosiante ne’ebé durante ne’e faan motor no karreta iha estrada públiku iha kapitál Dili.

“Relasiona ho kontrolu kona-ba transporte motor no karreta sira-ne’ebé faan iha estrada públiku, tuir lolos ida-ne’e kompeténsia Polísia Tranzitu mak haree ba asuntu ne’e. Maibé la taka dalan katak bazea ba dekretu-lei númeru 33/2008 iha artigu 05 to’o 09 hateten katak karik balun mak kontra ordenamentu iha kapitál Dili mak ami mós iha kompeténsia atu bele fó hatene ba sira atu labele okupa espasu públiku sira-ne’e. Maibé ami hein katak ami sei koordena ho Dirasaun Transporte no Komunikasaun, liu-liu Polisía Lantas sira hodi haree ba kestaun ida-ne’e, tanba ida-ne’e sira-nia kompeténsia. Ami só ba avizu de’it katak ema sai hosi ne’ebá maibé atu foti medida ne’e tenke iha Dirasaun ne’ebé toma konta-ba ida-ne’e liu-liu Polísia Tranzitu,” Arthur Henriques informa ba Agência Tatoli, iha nia kna’ar fatin, Caicoli, Díli, segunda ne’e.

Iha prosesu koordenasaun ne’e Autoridade Munisípiu Dili ho Polísia Tranzitu sei halo operasaun konjunta, atu fó atensaun ba negosiante sira faan motor no karreta iha estrada públiku.

“Ba desizaun foti medida ne’e, ami sei hala’o iha fulan-setembru tinan ne’e, nune’e negosiante sira bele kumpre. Tanba, agora ami komesa ona aruma fatin sira-ne’ebé kria engrafamentu hanesan iha Kampung Baru noiha Elemloi, no depois ami sei halo operasaun hotu tiha mak ami ba fali karreta no motor sira,” nia dehan.

Tanba ne’e, Autoridade Munisípiu Dili garante no hatudu ona fatin ba negosiante faan motor no karreta sira iha Eis Merkadu iha Caicoli no seluk iha Tasi-Tolu hodi halo negósiu faan motor no karreta maibé negosiante mai faan fali iha fatin públiku hanesan estrada protokolu, ida-ne’e violasaun.

“Ida-ne’e ami sei halo duni koordenasaun ho Polísia atu haree kazu ida-ne’e,” nia dehan.

Autoridade Musípiu Dili durante ne’e la simu reseita hosi negosiante faan motor no karreta iha estrada protokolu, tanba atividade negósoiu MD seidauk fó autorizasaun ba negosiante faan motor no karreta iha estrada protokolu maibé fatin provizóriu uluk hatudu ne’e mak Eis Merkadu iha Caicoli no Tasi-Tolu.

Atividade faan motor no karreta ne’e hosi mentalidade komunidade nian tanba sidade Dili hanesan kapitál nasaun nian maibé inkonsiénsia ho negosiante sira mak kontinua faan maske AMD foti ona medida balun hodi fó hanoin.

“Ita foti medida dehan labele hanesan liuhosi ami halo aproximasaun beibeik, ema seluk kontinua faan. Aleinde ami foti medida mós semana ida no rua, sira kontinua nafatin, ho ida-ne’e mak sai obstakulu ba ami-nia servisu atu oinsá koordena didi’ak kapitál Dili. Maibé, ami kontinua nafatin ami-nia servisu hodi fó hanoin,” nia dehan.

Tanba ne’e, nia husu ba negosiante sira hotu katak hanesan timoroan no sidadaun ida-ne’ebé di’ak iha nasaun ne’e hotu-hotu haree Dili ne’e hanesan kapitál nasaun, oinsá koordena kapitál Dili ne’e ho moos no organizadu, nune’e ema rai-li’ur mai katak Timor ne’e merese atu ukun an.

Entretantu, tuir observasaun Agência Tatoli iha terenu nota katak negosiante timoroan sira ne’ebé halo atividade negósiu faan karreta no motor ne’e iha fatin dalan públiku besik Kaza Eurepia tasi-ibun, balun faan iha estrada públiku besik Timor Plaza, balun iha Tasi Tolu no seluk tan.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!