DILI, 16 agostu 2022 (TATOLI)–Diretór Nasionál Edukasaun Pre-Eskolár (DNEPE) hosi Ministériu Edukasaun Juventude no Desportu (MEJD), Tomas Pereira, relata, labarik ho idade 3 to’o 7 hamutuk 160 rejistadu partisipa iha programa ‘eskola iha uma’ iha suku Bebonuk no Madohi.
“Ita iha sentru neen maka estabelese ona iha fatin-lima iha suku Bebonuk no Madohi. Fatin sira ne’e kuaze hahú ona prosesu ensinu aprendizajen ba labarik sira liuhosi programa eskola iha uma,” Diretór informa iha edifísiu MEJD, Vila Verde, tersa ne’e.
Atualmente MEJD kontinua atualiza dadus labarik sira kada loron tanba prosesu aprendizajen hahú ona maibé inskrisaun ba labarik sira mós kontinua la’o nafatin. Tanba ne’e dadus ne’ebé DNEPE rekolla seidauk ramata iha suku rua ne’e.
Notísia relevante: MEJD deside profesór voluntáriu 470 apoiu programa eskola iha uma
Suku Bebonuk nian harii sentru ida iha sede suku ne’ebé akumula aldeia Metin I no Metin II, ho totál labarik hamutuk na’in-40 resin, iha mós sentru ida iha Metin IV akumula labarik hamutuk na’in-10 resin, no sentru ida harii tan iha aldeia 20 setembru ne’ebé akumula labarik hamutuk na’in-30 resin.
Iha fali suku Madohi, estabelese mós sentru ida iha sede suku ne’ebé akumula labarik hosi aldeia Beto Tasi no Beto Leste hamutuk na’in-30 resin no sentru ida harii tan iha aldeia Loromatan ne’ebé akumula labarik hamutuk na’in-30 resin.
Atividade eskola iha uma ne’e foin realiza iha suku rua ho sentru provizória neen iha aldeia hitu, maibé hosi suku rua ne’e sei iha aldeia balun maka seidauk estabelese sentru sira, nune’e bainhira númeru atinje duni maka tenke loke tan sentru.
“Planu ne’ebé DNEPE deside ona kada sentru ida tenke akumula de’it labarik hamutuk 20, ne’ebé kada aldeia ida maka labarik na’in-40 resin entaun tenke estabelese tan sala rua,” nia akresenta.
DNEPE mós iha hela prosesu andamentu nia laran, ne’ebé tuir planu sei estabelese tan sentru 25 tuir mai iha Dili laran. Sentru sira ne’e sei iha prosesu identifikasaun nia laran ne’ebé DNEPE sei serbisu hamutuk ho Diresaun Servisu Edukasaun Dili no Prezidente autoridade hodi haree prosesu ne’e.
“Ita iha ona lista aldeia hamutuk 81, maibé ita seidauk simu sira-nia proposta atu estabelese tan sentru sira,” nia tenik.
Jornalista : Tomé Amado
Editora : Julia Chatarina
