DILI, 16 agostu 2022 (TATOLI)—Prezidente Konsellu Kombatente Libertasaun Nasionál (CCLN-sigla portugés), Vidal de Jesus ‘Riak Leman’, informa verifikikasaun dadus veteranu rejistadu 2009 ne’e to’o agora munisípiu Baucau ho Ermera mak seidauk konklui tanba ema barak no kestaun tempu.
Notísia Relevante: MAKLN sei reverifika dadus veteranu pendente 6,177 iha territóriu nasionál
“Ita-nia prosesu verifikasaun dadus veteranu rejistadu 2009 nian ne’e falta Baucau ho Ermera mak seidauk konklui maibé tempu mak hotu uluk no ema barak mak ninia dadus seidauk verifika,” Riak Leman hateten ba Agência Tatoli, iha nia kna’ar fatin Comoro, Dili, tersa ne’e.
Maibé, tuir nia, la signifika munisípiu seluk hotu ona 100% maibé iha balun ne’ebé seidauk verifika tanba momentu COVID-19 no iha ema balun sai tiha bainhira ekipa tama iha sira-nia suku hodi halo verifikasaun.
“Ita bele dehan hotu ona maibé iha balun ne’ebé ita seidauk verifika tanba kalendáriu ne’ebé fó sai ne’e kada suku ho loron haat de’it. Entaun ba ida-ne’e ba ami la to’o atu bele konklui verifikasaun ida-ne’e,” nia esplika.
Tanba, iha suku ida ema barak entaun labele verifika hotu iha loron haat nia-laran no bainhira seidauk verifika hotu, presiza aumenta loron hodi finaliza iha suku ida, entaun bele prejudika fali servisu ne’e no labele hotu tuir kalendáriu ne’ebé iha.
“Maibé, ekipa nafatin esforsu para finaliza tuir tempu ne’ebé determina ona no kona-ba seidauk ne’e ita sei verifika fila-fali.” nia dehan.
Entretantu Sekretáriu Estadu Asuntu Libertasaun Nasionál (SEAKLN), Júlio de Conceição, hateten, iha prosesu verifikasaun ne’e ekipa verifikadór nasionál hasoru dezafiu oioin tanba liga ho dokumentu ema barak mak halo tuir nia hakarak de’it.
“Kuandu veteranu sira mai rejistu halo ita mak ulun moras, tanba mai konta istória ne’ebé oioin de’it, maibé dala barak la tuir ninia servisu ne’ebé durante nia kontribui. Entaun ida-ne’e sai dezáfiu ida ba ita, tenke fera ulun no presiza tempu mak bele konklui, ” nia dehan.
Nia informa, veteranu iha territóriu nasionál ne’ebé mak rejistu iha tinan 2009 no sei halo verifikasaun ne’e hamutuk 124.680.
Liuhosi konteúdu ne’ebé mensiona iha Estatutu Kombatente Libertasaun Nasionál, Lei númeru 3/2006 no artigu 13 hateten, registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekuiñesimentu hanesan Kombatente Libertasaun Nasionál ne’ebé rejista iha tinan 2009.
Notísia Relevante: Prosesu verifikasaun dadus veteranu rejistadu 2009 iha Ermera seidauk termina
Jornalista : Osória Marques
Editór : Cancio Ximenes
