Top

PNTL detein autór na’in-ida ne’ebé so’e bomba molotov iha Comoro

Membru PNTL na’in-rua hosi eskuadra Dom-Aleixo hetan kanek iha ulun no ain. Imajen/PNTL

DILI, 19 agostu 2022 (TATOLI)— Polisia Nasionál Timor-Leste, munisípiu Dili, konsege detein autór na’in-ida ho inisiál RBH (tinan 24), ne’ebé deskonfia tuda bomba Molotov ba ajente Polísia sira ne’ebé asegura seremónia garduasaun Persaudaraan Setia Hati Terate (PSHT) iha área Comoro-Dili.

Suspeitu tuda bomba refere, horikalan, hodi rezulta Membru Polisia Nasionál Timor-Leste (PNTL) na’in-rua ho naran, ajente Leonito C. Gonçalves no Ajente prinsipál Nicolao dos Santos, hosi eskuadra Dom-Aleixo hetan kanek iha ulun no ain to’o ikus suku pontu lima.

Membru PNTL na’in-rua hosi eskuadra Dom-Aleixo hetan kanek iha ulun no ain. Imajen/PNTL

Ho nune’e, Portavóz Komandu Jerál PNTL, Superintendente Polísia Armado Monteiro, informa hafoin seremónia graduasaun iha área Timor Lodge-Comoro ajente Polísia sira hetan duni atake hosi joven balun no so’e bomba molotov hodi rezulta ajente na’in-rua ne’e kanek.

“Sim kazu ne’e akontese duni hodi rezulta ita nia membru PNTL na’in-rua mak kanek tanba joven na’in-rua mak so’e bomba Molotov ba sira no daudaun sira halo hela tratamentu saúde. PNTL mós konsege detein suspeitu na’in-ida hanesan autor prinsipál ba kazu ne’e,” Portavóz Komandu Jerál PNTL ne’e hateten ba Agência TATOLI via telefónika.

Tuir kornolojia kazu ne’ebe TATOLI asesu katak, suspeitu sa’e motór mak tuda bomba molotov ba ajente sira bainhira hala’o hela seguransa iha Timor Lodge ba serimónia graduasaun PSHT nian.

Kazu ne’e mosu tanba membru PNTL hapara sira la tau kapasete no sira diskute malu no suspeitu ida tuun bá tebe ajente polisia ida, hafoin ajente seluk halai ba atu ajuda  mak suspeitu sira so’e bomba Molotov ne’e.

Hafoin akotesementu ne’e, PNTL konsege detein suspeitu na’in-ida ho inisiál RBH no na’in-ida konsege halai no PNTL halo mós apreensaun autór sira nia motór ne’ebe mak sira uza hodi halo asaun brutal hasoru ajente na’in-rua ne’e.

Daudaun, membru PNTL na’in-rua halo hela tratamentu saúde iha Klínika Kampung Baru enkuantu suspeitu RBH detein ona iha sela detensaun Caicoli hodi hein oras 72 kompleta atu kontinua prosesu ba interrogátoriu dahuluk.

Jornalista: Natalino Costa

Editór         : Florencio Miranda Ximenes

Publisidade

Leave a Reply

Latest Post

error: Content is protected !!