DILI, 20 agostu 2022 (TATOLI)-–Jenerál Forsa Armada Indonézia (TNI, sigla Indonézia), Muhammad Andika Perkasa, akompaña hosi nia espoza, Diah Erwiany Trisnamurti Hendrati, sábadu ne’e, hala’o vizita ba jardín eroi (TMP-Taman Makam Pahlawan), Seroja, Balide, hodi tau aifunan ba eroi Indonézia nian.
“Vizita ida-ne’e hanesan onra ida mai ha’u, maibé lembransa ida-ne’e atu sai responsabilidade ba líder militár sira-nian, la’ós iha Indonézia no Timor-Leste de’it maibé iha mundu tomak, ita tenke promove dame no pás,” Jenerál TNI hateten, hafoin tau kari aifunan.
Notísia relevante: Hetan medalla méritu, Jenerál Andika agradese ba Estadu Timor-Leste
Vizita ne’e akompaña mós hosi Embaixadór Indonézia ba Timor-Leste, Okto Dorinus Manik, Adidu Defeza Indonézia, Yunianus Pandapotan Simamora inklui entidade relevante seluk.
Aleinde ne’e, Jenerál TNI ho nia espoza kuda mós ai-oan iha jardín ne’e nu’udar tradisaun ne’ebé durante ne’e líder sira hosi Indonézia halo bainhira vizita ba TMP.
Andika Perkasa konsidera vizita ne’e nu’udar ema militár ne’ebé iha funsaun prinsipál no responsabilidade hanesan mós ho F-FDTL.
“Loos duni, sira ne’e hotu fó hanoin fali ita katak tenke lori dame no pás, ita lakoi tan atu iha vítima hosi sé de’it, karik ita bele moris no avansa hamutuk, ida-ne’e mak ita tenke halo iha futuru. Ita tenke hamutuk unidade tanba ita-nia inimigu agora mak kiak. Ita tenke hamutuk dezenvolve, hanesan TNI iha Indonézia hola perte mós iha Governu hodi fó apoiu hanesan iha saúde, agrikultura no mós iha kestaun distribuisaun sira, nune’e sira ne’e hotu sei aselera inklui hadi’a bem estar ba povu,” Líder másima militár Indonézia ne’e dehan.
Tuir nia, luta ba moris di’ak povu ne’e importante atu kore povu hosi kiak.
“Ha’u sente ida-ne’e ita hotu nia mehi, tantu F-FDTL no TNI, ita tenke ajuda idak-idak nia Governu ba dezenvolve nasaun no iha nível militár ba militár ita koopera di’ak liután,” Jenerál ne’e reforsa.
Delegasaun Jenerál Andika Perkasa no Diah Erwiany Trisnamurti Hendrati to’o iha Dili iha sesta (19/08), ho aviaun Militár nian, hodi partisipa iha selebrasaun aniversáriu FALINTIL da-47.
Jornalista : Antónia Gusmão
Editora : Julia Chatarina
