Graduasaun PSHT iha Bobonaro la’o ho hakmatek
BOBONARO, 23 agostu 2022 (TATOLI) – Komandante Operasaun PNTL munisípiu Bobonaro, Inspetór Xefe Armando Sila, informa, serimónia graduasaun ba membru Persaudaraan Setia Hati Terate (PSHT) foun la’o ho hakmatek tanba Ikatan Kera Sakti (IKS) no Kmanek Oan Rai Klaran (KORK) kontribui seguransa interna.
Inspetór Xefe ne’e informa, serimónia graduasaun ne’e la’o ho susesu tanba hahú iha loron 20 to’o segunda loron 22 ne’e situasaun seguransa iha munisípiu Bobonaro, liuliu iha fatin serimónia Jináziu Maliana no armazein kompañia Sembuhan Unipesoál Lda, Soso, Maliana, la’o ho ambiente hakmatek.
Notísia relevante: PNTL Bobonaro koloka efetivu 145 asegura graduasaun kandidatu PSHT
“Realidade hatudu duni katak organizasaun IKS no KORK kontribui másimu, apoia seguransa interna dezde loron 21 ate ohin dadeersan, ne’e mak rezulta situasaun hotu-hotu la’o hakmatek tanba kooperasaun entre seguransa interna entre organizasaun tolu ne’e,” Armando informa ba Jornalista sira, iha kna’ar fatin, Maliana, segunda ne’e.
Nia haktuir, molok serimónia ne’e la’o, komandu PNTL munisípiu Bobonaro koloka efetivu tomak no hetan apoia mós hosi Batallaun Orden Públika (BOP) kompañia Delta, Soso, Maliana no FALINTIL-Forsa Defeza Timor-leste (F-FDTL ) postu destakamentu Tunubibi halo seguransa masimu iha areadór serimonia no halo patrulamentu iha kapitál Maliana.
“Serimónia graduasaun ne’ebc mak hala’o iha horisehik ho ambiente ne’ebé kapaas tebes, laiha akontesimentu ruma durante sira halo graduasaun ne’e,” nia dehan.
Komandante operasaun ne’e apela ba organizasaun arte-marsiál tolu ne’e atu kontinua apoia no koopera malu ho arte-ritual sira-ne’ebé eziste iha munsípiu Bobonaro laran tomak ba iha kualkér atividade nune’e bele hatudu komportamentu no étika di’ak ba komunidade hodi ajuda autoridade seguransa garante situasaun hakmatek iha rai laran.
“Ha’u husu ba organizasaun hotu-hotu tenke kaer metin prinsípiu katak, hakribi violínsia, hadomi malu hodi kontribui ba estabilidade no dezenvolvimentu iha munisípiu Bobonaro,” nia hateten.
Notísia relevante:SEJD husu membru PSHT foun iha Bobonaro hatudu imajen di’ak ba sosiedade
Jornalista: Sérgio da Cruz
Editór:Evaristo Soares Martins
