SEFOPE aprova proposta grupu auto-empregu ualu iha Bobonaro

BOBONARO, 25 agostu 2022 (TATOLI)-Sekretaria Estadu Formosaun Profesionál no Empregu (SEFOPE) nasionál aprova ona proposta auto-empregu hamutuk ualu iha munisípiu ne’ebe juventude sira submete iha tinan 2022 ne’e.

Diretór SEFOPE munisípiu Bobonaro, Calisto Mau-Ati, esplika, iha fulan-janeiru to’o marsu tinan 2022 iha grupu 12 mak pasa ona iha selesaun dokumentu hodi ba halo avaliasaun proposta finál iha nasionál.

Notisia relevante: SEFOPE Bobonaro simu proposta auto-empregu hosi grupu 12

“Rezultadu hosi avaliasaun proposta ualu mak hetan aprovasaun ne’ebé hala’o hosi membru sira, daudaun ne’e sira mós asina ona kontratu, hein de’it apoia ne’e atu to’o iha grupu sira- ne’e,” nia informa ba Jornalista sira iha knaar-fatin, Maliana, kinta ne’e.

Nia dehan, proposta ualu ne’ebé pasa avalisaun finál ne’e ho nia área karpintária, ofisina tolu, ortikultura ida, peska no prodús tempe no tahu.

Enkuantu lokalizasaun ba implementasaun atividade juventude sira-nia iha postu administrativu Atabae ida, Cailaco ida no restante maioria iha postu Maliana.

Programa ne’e hanesan planu anuál SEFOPE nia implementa kada tinan ho objetivu atu dezenvolve ema-nia kreativdade hodi hadi’ak ekonomia família no rai laran.

Calisto Apela ba grupu benefisiáriu sira bainhira SEFOPE nasionál transfere ona orsamentu ba konta bankária grupu tenke utiliza no halo jestaun didi’ak nune’e bele atinje meta ne’ebé define ona hodi hadiak moris no fó empregu mós ba ema seluk.

“Tenke uza orsamentu Estadu ne’e ho didi’ak, tanba osan ne’e ema barak mak presiza apoiu ne’e, ne’ebé ita-boot sira- ne’ebé mak hetan ona iha tinan ne’e, agradese wain ba ita-boot sira, maibé importante liu mak tenke halo jestaun di’ak ba osan ne’e,” nia apela.

Iha tinan 2021 liubá, Governu prevee tán orsamentu ho montante $5,700 ba SEFOPE Bobonaro, atu apoia grupu auto-empregu ne’ebé mak daudaun ne’e submete ona proposta atu hetan fundus, hodi fanansia atividade.

Hahú 2015 to’o 2017, SEFOPE Bobonaro apoia ona grupu auto-empregu iha suku, Holsa, Ritabou, Odomau, Tapo-Memo, Lahomea no Raifun, postu administrativu Maliana, ho atividade hakiak fahi iha grupu lima, karpintária rua, dulas hare, soru no homan, tahu-tempe, alfaiate, rentál copy, soru tais, ofisina no ortikultura orgánika.

Iha postu adiminiatrativu Cailaco, grupu auto-empregu iha suku Meligo, Bilimau no Manapa, ho atividade mak hanesan, ofisina, dulas hare no karpintária.

Postu administrativu Bobonaro, grupu ida de’it iha suku Lourba ho setór tipu kinur rahun. Enkuantu iha postu administrativu Lolotoe mós iha grupu ida de’it, iha suku Lupal ho atividade karpintáriaria.

Postu administrativu Balibo iha grupu haat iha suku Leohitu, Palaka, Cowa no Batugade ho atividade peska, hakiak ikan no karpintária.

Postu administrativu Atabae iha grupu rua mak hanesan iha suku Atabae no Rairobo, ho atividade hakiak ikan.

Grupu hirak-ne’e, rejista dezde 2015 to’o 2017, iha tinan tuir mai iha prosesu avaliasaun nia laran, tanba kestaun Covid-19 no situasaun polítika.

Notisia relevante:SEFOPE Bobonaro fó oportunidade ba kriasaun auto-empregu

Jornalista: Sérgio da Cruz

Editór: Evaristo Soares Martins