Kliente bele foti osan hosi banku seluk bainhira mákina BNCTL avaria
DILI, 31 agostu 2022 (TATOLI)–Diretór Ezekutivu Banku Nasionál Komérsiu Timor-Leste (BNCTL, sigla portugés), Brígido de Sousa, hateten, kliente bele foti osan hosi mákina Automated Teller Machine (ATM) banku seluk bainhira mákina BNCTL avaria.
“ATM ne’e agora banku hanesan BNU, Mandiri no BRI adere ona ba sistema P24, signifika katak kliente BNCTL bele foti osan iha mákina banku sira ne’e, karik iha mákina BNCTL avaria hela,” Diretór Ezekutivu BNCTL hateten ba jornalista sira iha Palásiu Prezidensiál, Bairru Pité, kuarta ne’e.
Responsável banku nasionál ne’e dehan, dalaruma kliente seidauk informadu maibé BNCTL halo sosializasaun bebeik ona.
“Mákina avaria ka problema ruma ne’e sempre akontese, ita labele hanoin mákina ne’e funsiona 100%, maibé ami-nia ekipa sempre akompaña kuandu problema ruma halo intervensaun kedas hodi hadi’a, karik mákina ida ka rua mak avaria ne’e normál, maibé dalaruma kliente sira ba iha mákina ida ladi’ak tau ona iha facebook dehan mákina hotu ladi’ak,” nia akresenta.
Notísia relevante: BNCTL sei aumeta mákina ATM ida iha Viqueque
Diretór Ezekutivu ne’e husu kliente atu uza didi’ak fasilidade ne’ebé iha hanesan P24, ne’ebé iha ona kolaborasaun servisu ho banku seluk.
“Daudaun mákina ATM BNCTL nian instala iha Dili hamutuk 30 resin, ne’e sufisiente ona atu kliente sira ho tan fasilidade P24 bele foti osan iha ne’ebé de’it,” nia tenik.
Iha tinan ne’e, BNCTL aumenta tan mákina foun hamutuk 27, ATM drive thru rua, ATM mobile lima, nune’e totál ATM iha territóriu laran tomak hamutuk unidade 68.
Atu responde ba kliente iha kapitál Dili, BNCTL aumenta mákina ATM hamutuk unidade 39 ne’ebé adere ona ba servisu P24.
Nune’e, parte seluk Banku Nasionál mós lansa integrasaun POS BNCTL ba rede P24 unidade 100 nune’e totál mákina hamutuk 150 no Union Pay internasionál hodi fasilita kliente halo tranzasaun iha loja supermerkadu, klínika estasaun kombustível, selu pasaporte, restaurante no seluk tan.
Jornalista : Antónia Gusmão
Editora : Julia Chatarina
