iklan

NASIONÁL, KAPITÁL

AMD sei mobiliza komunidade simu Kardeál Don Virgílio iha Aeroportu

AMD sei mobiliza komunidade simu Kardeál Don Virgílio iha Aeroportu

Papa Francisco realiza misa agradesimentu ba kardeál na’in-20. Imajen/Mídia PR.

DILI, 02 setembru 2022 (TATOLI)—Governu liuhosi Autoridade Munisípiu Dili (AMD), segunda (05/09), sei organiza no mobiliza komunidade iha kapitál Dili hodi simu eminénsia reverendisima Kardeál Don Virgilio do Carmo da Silva, SDB iha aeroportu internasionál Prezidente Repúblika Nicolau Lobato, Comoro, Dili.

Notísia Relevante: Grupu kulturál hosi Nahareka sei simu Kardeál ho dansa tradisionál

“Munisípiu Dili integra mós iha komisaun organizadora, liu-liu fó kompetensia mai ita atu trata asuntu tolu hanesan limpeza, organiza vendedóres ambulante sira no organiza no mobiliza ita-nia komunidade ba partisipa iha loron 05 setembru simu ita-nia Kardeál sei tun iha Aeroportu no mós iha loron 06 ba misa agradesimentu iha Tasi-Tolu,” Adjuntu Prezidente Autoridade Munisípiu Dili (AMD), António Moniz Clau, informa ba Agência Tatoli iha nia kna’ar fatin, Dili, sesta ne’e.

Komunidade ne’ebé Autoridade Munisípiu Dili sei organiza no mobiliza hodi simu Kardeál iha aeroportu, Comoro, Díli mak komunidade iha Munisípiu Dili.

“Ita ko’alia kona-ba ita-nia komunidade munisípiu Dili, hanesan Igreja fó sai ona maibé hanesan Autoridade ne’ebé responsabiliza mós ba ita-nia área territóriu munisípiu Dili nian, ita fó hatene ba ita-nia komunidade sira atu partisipa másimu iha eventu rua, hanesan loron 05 setembru simu ita-nia Kardeál iha aeroportu no 06 partisipa misa iha Tasi-Tolu,” nia informa.

Aleinde organiza no mobiliza komunidade, iha horibainrua Autoridade Munisípiu Dili liuhosi pesoál saneamentu mós halo ona limpeza iha área Tasi-Tolu to’o Rotunda Nicolau Lobato no sei kontinua nafatin limpeza iha Dili laran liu-liu ba estrada protokolu sira ne’ebé ita-nia bainaka importante sira sei liu iha ne’ebá.

Aleinde organiza no limpeza Autoridade Munisípiu Dili mós organiza no hasai ona vendedór ambulante sira-ne’ebé faan sasán iha Tasi-Tolu.

“Imi haree iha Tasi-Tolu ba ita-nia vendedór ne’ebé faan iha estrada ibun no ai-okos atu halo misa ba, ita hasai hotu ona ba iha Danau 02 nian,” nia dehan.

Administradór Postu Administrativu Vera Crúz, Manuel Gusmão, akresenta nia parte iha ona informasaun hodi organiza no mobiliza komunidade hodi simu Kardeál Don Virgilio do Carmo da Silva, SDB iha aeroportu.

“Ami iha ona informasaun no ha’u mós involve iha komisaun seksaun mobilizasaun, orsida lorokraik ha’u enkontru ho xefe suku sira atu orienta hodi mobiliza ita-nia komunidade simu kardeál. Tanba, foin primeira vés Timor-Leste hetan kardeál ida ne’ebé timoroan rasik mak sai kardeál iha ita-nia rain, tanba ne’e hanesan timoroan ita orgollu,” nia dehan.

Hosi ne’e, nia parte mós koordena ona ho Diretór eskola iha Faról atu nune’e estudante sira mós partisipa hodi simu kardeál iha aeroportu.

“Ohin, ha’u koordena ona ho Diretór eskola iha Faról, aliende komunidade, estudamte sira mós sei partisipa hodi simu ita-nia kardeál ne’ebé sei mai iha loron 05 setembru ne’e,” nia dehan.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!