iklan

EKONOMIA, BOBONARO, MUNISÍPIU

Projetu gabiaun iha Holsa atinje 60%

Projetu gabiaun iha Holsa atinje 60%

Projetu instalasaun gabiuaun ne'ebé implementa hosi Empreza Tansos Unipesoál Lda Join Venture ho Vamelda Unipesoál Lda, iha aldeia Solugolo, suku Holsa, postu administrativu Maliana, munisípiu Bobonaro. imajen Tatoli/Sérgio da Cruz.

BONONARO, 07 setembru 2022 (TATOLI)- Enjeñeiru kompañia Tansos, unipesoál Lda, Arnoldos Bragança, hateten progresu fíziku ba implementasaun projetu instalasaun gabiaun ne’ebé lokaliza iha aldeia Solugolo, suku Holsa, postu administrativu Maliana, munisípiu Bobonaro, daudaun atinje ona 60%.

Notísia relevante: Kombustível ilegál kontinua tama iha Bobonaro, Abomkase Fuel taka provizóriu

“Agora ne’e instalasaun ba gabiaun tama ona ba 60%. Ita iha kuantidade totál 9.570 kúbiku, agora ha’u seidauk atualiza beibeik tanba serbisu la’o hela, maibé nia tama ona 6.000 kúbiku,” nia informa ba Jornalista sira iha Maliana, kuarta ne’e.

Bragança fó-sai katak, obra ne’e ho distánsia metru 290, ho ninia serbisu iha oin tolu, no daudaun ne’e site segundu no terseiru konklui ona, falta de’it site primeiru mak sei iha hela prosesu instalasaun.

Maske obra refere la’o ho progresu di’ak, maibé seidauk garante finaliza tuir kontratu ne’ebé selebra ona ho Ministériu Obra Públika.

“Dalaruma ami sei haree fila-fali, tanba tempu ba iha kontratu, iha udan dalaruma la atinje tanba iha-ne’ebá dalaruma mota tún entaun haan tempu ke’e naruk atu sira halo serbisu fila-fali,” nia dehan.

Obra ne’e responsabiliza hosi empreza lokál Tansos Unipesoál Lda, join venture ho Vamelda Unipesoál Lda, ho montante Orsamentu $590,530.78.

Xefe suku Holsa, postu administrativu Maliana, munisípiu Bobonaro, António Santa Cruz, sente kontentenno agradese ba Ministériu Obra Públika tanba tau ona prioridade, ne’ebé durante ne’e komunidade sira hein hela.

Nu’udar lideransa komunitária durante ne’e prekupadu tanba iha tinan hirak liubá, bainhira udan monu rai bee mota Soso sempre fó ameasa beibeik ba komunidade nia vida inklui kintál lubuk ida mak bee lori halai lakon hotu.

Xefe suku ne’e observa katak, bainhira akontese udan hafoin liu oras balun bee hahú menus kedas, maibe tanba mota refere maske kloot, entaun forsa bee tebe  maka’as, nune’e bainhira akontese udan durante semana ida tomak bele fó risku ba komunidade sira tanba aliserse rai ladún metin atu satan bee ne’ebé sulin maka’as hosi mota ulun.

“Karik projetu ne’e mak atinje ona 50% ka 60%. Ha’u sente serbisu ida-ne’e bele ona proteje ha’u-nia komunidade sira hosi ameasa hosi mota,” nia hateten.

Enkuantu tuir dadus monografia suku Holsa tinan 2021, komunidade iha aldeia Solugolo hamutuk 2.558 kompostu hosi feto 1.287 no mane 1.271, ho total uma-ka’in 593.

Notísia relevante: Komunidade Holsa besik uma-ka’in 100 seidauk simu cesta bázika

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!