2017-2022: Asisténsia Tékniku Urbana kontribui reseita $828.801 ba kofre Estadu

DILI, 08 setembru 2022 (TATOLI)—Xefe Departamentu Asisténsia Tékniku Urbana iha Ministériu Administrasaun Estatál, Abel Bere, hateten hosi 2017-2022 ne’e Asisténsia Tékniku Urbana (ATU) liuhosi MAE hatama reseita ba kofre Estadu hamutuk $828,801,15 ne’ebé mai hosi fonte publisidade.
Notísia Relevante: Tinan 2019, MAE Hatama Reseita Publisidade Hamutuk $144.147 ba Kofre Estadu
“Ita kontribui ona reseita publisidade nian ba kofre Estadu, hahú hosi tinan 2017 to’o 2022 hamutuk $828,801,15,” Abel hateten ba Agência Tatoli, iha nia knar fatin Colmera, Dili, kinta ne’e.
Hosi total $828,801,15 ne’e, munisípiu Aileu kontribui $3,329,75, Ainaro $6,357,89, Baucau $9,432,45, Bobonaro $2,083,91, Covalima $12,033,56, Dili $733,454,96, Ermera $17,367,04, Lautém $1,791,82, Liquiça $31,682,08, Manatuto $10,688,09, Manufahi $580,60 no munisípiu Viqueque $219,21.
“Iha 2017 ne’e ita hatama $24,919,01, iha 2018 kontribui $213,724,07, iha 2019 ne’e iha $149,863,67, iha 2020 hatama $211,250,58, iha 2021 ne’e kontribui $132,454,98 no tinan 2022 ne’e hatama $96,588,84,” nia relata.
Nia dehan, tasa publisidade iha Viqueque nian kiik tebes tanba foin aplika iha fulan-agostu 2022 tanba rekursu mak menus, nune’e osan sei kiik hela no ba Rejiaun Administrativu Espesiál Oé-Cusse Ambeno (RAEOA) ne’e espesiál entaun ministériu labele kobre to’o iha ne’ebá.
Tuir nia, osan kontribui reseita ba kofre Estadu bazea ba dekretu-lei númeru 51/2016 ne’ebé mak ko’alia kona-ba lisensiamentu publisidade. maibé dekretu-lei ne’e mós halo ona alterasaun ba dekretu-lei númeru 31/2017.
“Dekretu-lei ida-ne’e ami halo ona sensibilizasaun ba iha teritórriu nasionál tomak no mós mensajen publisidade ne’e eziste ona durante tinan 2017 to’o agora,” Bere esplika.
Xefe Departamentu Asisténsia Tékniku Urbana iha Ministériu Administrasaun Estatál (MAE-ATU), Abel Bere, hateten publisidade nasionál no internasionál no dala barak kompañia internasionál Instant Shop mak hatama reseita barak liu.
Jornalista : Osória Marques
Editór : Cancio Ximenes

