DILI, 08 setembru 2022 (TATOLI)—Diresaun Nasionál Ensinu Rekorrente (DNER) hosi Ministériu Edukasaun Juventude no Desportu (MEJD) prevee orsamentu $455.714 atu prepara elaborasaun kurríkulu nível sekundáriu iha programa ekivalénsia nian.
“Daudaun ita foin maka prevee orsamentu iha tinan 2023 atu prepara ekipa téknika ruma atu mai halo serbisu kona-ba elaborasaun kurríkulu nível sekundáriu ensinu rekorrente nian,” Diretór Nasionál Ensinu Rekorrente, Quintão da Costa Massa, informa ba Agência Tatoli, foin lalais ne’e, iha edifísiu SKB Vila Verde.
Notísia relevante: Governu sei implementa materia istória iha kurríkulu ensinu
Durante ne’e programa ekivalénsia ne’ebé maka hala’o daudaun ne’e foin atualiza ba kurríkulu nível báziku nian, tanba ne’e difikulta mós joven sira ne’ebé abandona eskola iha nível ensinu sekundáriu labele hetan diploma.
“Ministeriu Edukasaun liuhosi Diresaun Nasionál Ensinu Rekorrente rasik ho ninia polítika hakarak kria tan kurríkulu. Ita hakarak atu elabora kurríkulu ida ba sekundária, atu nune’e labele halo diskriminasaun ba sira tanba sira iha direitu atu hetan edukasaun non formál ida hodi hakat ba edukasaun formál,” nia akresenta.
Esforsu ne’ebé DNER halo bele ajuda timor-oan iha nível sekundáriu atu kontinua estudu ba ensinu superiór, nune’e ho ida-ne’e mak sei redús problema abandona eskola.
“Loloos planu no programa elaborasaun kurríkulu nível sekundáriu nian realiza ona, maibé tanba orsamentu la aprova maka buat hotu labele realiza. Ba tinan ne’e sira tenta tau fali osan ba planu ida-ne’e atu oinsá bele buka halo filafali elaborasaun,” nia tenik.
Jornalista : Tomé Amado
Editora : Julia Chatarina
