DILI, 12 setembru 2022 (TATOLI)—Prezidente Autoridade Munisípiu (PAM) Dili, Guilhermina Filomena Saldanha Ribeiro “Margi”, hatete nia parte sei halo xamada atensaun ba administradora postu administrativu Nain Feto, munisípiu Dili, Herminia Moniz, atu orienta seguransa hodi kontrola motor para iha jardin Largo Lecidere nia laran.
Notísia Relevante: Postu Nain Feto seidauk simu orientasaun kontrola motor para iha jardin laran
“Orsida ha’u telefóne kedas ba administradora Nain Feto atu favór ida konsidera no hola atensaun, atu fó orden ba pesoál ne’ebé iha terrenu, hanesan seguransa no sira ne’ebé hamoos jardin hodi hato’o hela ba vizitante sira atu labele para motor iha jardin laran,” Guilhermina Filomena hateten ba Agência Tatoli iha nia kna’ar fatin, segunda ne’e.
Tuir nia, postu administrativu Nain Feto daudaun ne’e iha pesoál saneamentu no pesoál seguransa sira-ne’ebé koloka iha jardin Largo Lecidere atu asegura hodi hamoos lixu no hamatan ba vizitatnte sita atu labele para motor iha Jardin laran.
“Ha’u hanoin katak iha Nain Feto, sira mós iha ema-nain hira ne’ebé asegura ba jardin no seguransa, entaun responsabilidade ba sira-ne’ebé halo seguransa ba jardin ne’e atu haree ba asuntu sira-ne’e. Tanba motor para iha fatin parajen ne’ebé hosi ita-nia Ministériu Obra Públika, liuhosi Transporte sira tau ona, entaun motor ne’e para iha fatin ne’ebé loloos. Se ita ko’alia seidauk iha autorizasaun, entaun prezensa hosi pesoál no seguransa iha jardin atu halo saida, tanba sira atu haree duni ba asuntu ida-ne’e. Sira-nia kompetensia mak haree no hateten ba vizitante sira katak favór maun no alin para motor iha ne’ebá, la’os para iha jardin laran. Tanba, jardin atu ita tu’ur lori simu anin malirin, han no lee livru iha ne’ebá,” nia dehan.
Aleinde Jardin sai fatin hodi tuur no lee, jardin mós sai fatin ba joven sira halo diskusaun maibé se motor sira tama hotu iha jardin laran, la kleur duut no ai-funan sira-ne’ebé kuda iha ne’ebá bele aat no pior liután kuandu bailoron naruk, mezmu rega loro-loron, dut no ai-funan atu moris ne’e susar.
“Tanba ne’e, husu ba vizitante sira-ne’ebé uza motor no maun no alin sira-ne’ebé lori gerobak faan nuu no sasán iha ne’ebá (jardin Largo Lecidere), favór atu labele tama liu iha Jardin laran, maibé para iha fatin mamuk. Ba motor no karreta ne’e, iha ona fatin parajen ne’ebé Governu liuhosi transporte tau ona iha ne’ebá,” nia informa.
Entretantu, tuir observasaun jornalista iha terenu nota katak motor sira-ne’ebé para iha jardin Largo Lecidere, balun para iha fatin parajen no balun para iha fatin mahon jardin laran.
Jornalista : Nelia Fernandes
Editór : Cancio Ximenes
