iklan

EDUKASAUN, HEADLINE

Estudante DIT sei aprende operasaun mina no gás iha empreza SundaGas

Estudante DIT sei aprende operasaun mina no gás iha empreza SundaGas

Reitór DIT, Alvaro Menezes Amaral, asina akordu kooperasaun ho Diretór Ezekutivu SundaGas Banda Unipessoal Lda, Andy Butler, iha salaun DIT, tersa (13/09). Imajen Tatoli/Francisco Sony

DILI, 13 setembru 2022 (TATOLI)-Estudante Dili Institute of Technology (DIT) sei hetan oportunidade aprende halo operasaun mina no gás iha empreza SundaGAS Banda Unipesoál, Lda tanba instituisaun ensinu superiór ne’e realiza ona memorandu entendimentu ho empreza ba implementasaun programa ba tempu naruk.

Reitór DIT, Alvaro Menezes Amaral, hateten oportunidade ida-ne’e sai hanesan vantajen boot ida ba estudante sira hotu tanba hahú aprende oinsá halo negósiu ba operasaun mina no gás tanba projetu SundaGas ne’e rasik eziste ona iha Timór.

“Ha’u kontente tebes bele serbisu hamutuk ho SundaGas. Tanba bainhira hakarak hetan progresu iha futuru, DIT tenke buka halo kooperasaun di’ak ho empreza sira iha área mina no gás tanba laiha dalan ida atu la’o mesak,” Reitór hateten hafoin ramata asina nota entendimentu ho empreza SundaGas, iha salaun DIT, tersa ne’e.

Notísia relevante: TL Asina Kontratu Fahe Produsaun ho SundaGas no TIMOR GAP Chuditch

Tuir Reitór, durante ne’e estudante DIT ne’ebé estuda petróleu aprende de’it maka teoria maibé atividade kada loron iha indústria sira difísil ba estudante sira atu asesu, tanba ne’e ho kooperasaun ne’e rasik bele loke oportunidade di’ak ba estudante sira atu hetan pratika.

“DIT hetan oportunidade hahú hosi divulgasaun informasaun jeolojia inklui aspetu tékniku balun ne’ebé bele lori daudaun ona estudante DIT hahú aprende,” nia akresenta.

Ho nune’e, DIT konsidera loron ida-ne’e importante tebes tanba bele hamutuk ho SundaGas realiza selebra akordu hodi apoiu joven sira iha instituisaun ne’e.

“Ami nu’udar instituisaun ne’ebé iha vizaun no misaun atu forma joven sira ho kompeténsia naton hodi bele asesu ba merkadu traballu liuhosi indústria mina no gás,” nia tenik.

Iha biban hanesan, Diretór Ezekutivu empreza SundaGas, Andy Butler, hateten, sira-nia parte halo kooperasaun atubele hala’o atividade analiza no esplorasaun mina no gás. Kooperasaun ne’e atu fahe esperiénsia ba estudante sira no hakarak hetan filafali  feedback, nune’e bainhira hakarak mai halo estájiu iha empreza SundaGas.

Kooperasaun ne’e ba durasaun tempu naruk tanba hakarak evalua no dezenvolve bloku ida-ne’e ba Timor-Leste nia futuru. “Tanba ne’e kooperasaun hahú ona ho DIT no fiar katak ba oin empreza SundaGas bele halo tan ho instituisaun ensinu superiór sira seluk,” nia dehan.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!