Orsamentu kontrata karreta tanke rega ai-horis iha Estrada públiku iha faze kompromisu
DILI, 13 setembru 2022 (TATOLI)—Adjuntu Prezidente Autoridade Munisípiu Dili (AMD), António Moniz Clau, informa orsamentu ba prosesu kontrata karreta tanke haat (4) ne’ebé atu rega ai-horis sira kuda iha jardin estrada protokolu iha kapitál Dili, daudaun ne’e sei iha faze kompromisu iha Autoridade Munisípiu Dili.
Notísia Relevante: AMD sei kontrata karreta tanke haat rega ai-horis iha estrada protokolu
“Ita-nia prosesu atu kontrata tanke haat (4) ne’ebé atu rega ai-horis no ai-funan iha jardin sira, nia progresu agora tama hela iha prosesu kompromisu. Ba tanke haat ne’e ita sei kontratu durante fulan tolu, hahú hosi setembru to’o novembru, depois to’o tempu udan ita hapara,” António Moniz Clau informa ba Ajénsia Tatoli iha nia knr fatin, Díli, tersa ne’e.
Ai-horis no ai-funan sira-ne’ebé daudaun mate iha jardin estrada protokolu ne’e tanba kompañia ne’ebé antes rega ne’e nia kontratu ramata ona.
“Depois hand over jardin sira iha mediu agostu, lolos ne’e antes sira atu hand over mai ami semana rua antes sira hato’o ona buat ruma mai ami atu ita halo preparasaun. Derrepente kuandu kompañia ida-ne’ebé servisu hamutuk ho obra públika ba apoiu rega jardin nia kontrata hotu ona, entaun sira tenke buka ona jardin ne’e atu hand over mai ami iha semana rua antes ona, entaun ami tama mós ai-oan sira ne’e mate ona. Maibé dadaun ne’e ami esforsu tomak atu oinsá asegura ita-nia ai-oan no ai-funan sira iha jardin tuir saida mak ami bele halo no agora daudaun iha hela prosesu,” nia dehan.
Entretantu, tuir observasaun jornalista Agência Tatoli iha terenu nota katak, ai-horis no ai-funan sira ne’ebé daudaun mate iha estrada protokolu mak iha área Timor-Plaza oin, Elemloi no sira seluk.
Jornalista : Nelia Fernandes
Editór : Cancio Ximenes
