iklan

EKONOMIA, HEADLINE

Governu sei halo revitalizasaun kafé tuan ektare 8.000 iha munisípiu neen

Governu sei halo revitalizasaun kafé tuan ektare 8.000 iha munisípiu neen

Plantasaun Kafé iha Munsípiu Ainaro, domingu (15/05). Imajen Tatoli/Francisco Sony

DILI, 15 setembru 2022 (TATOLI)—Diretór Jerál Floresta iha Ministériu Agrikultura no Peska (MAP), Raimundo Mau, hateten, tinan ne’e, Governu sei halo revitalizasaun ka tesi kafé tuan iha rai ektare 8.000 iha munisípiu neen hanesan Aileu, Ermera, Liquiçá, Manufahi, Bobonaro no Manatuto.

Diretór ne’e hateten, MAP tinan ne’e serbisu hamutuk ho Sekretaria Estadu Ambiente (SEA) halo revitalizasaun kafé, bazeia ba kontratu iha juñu 2022.

“Aban ofisilamente sei lansa tesi kafé tuan iha suku Fatumasi, postu administrativu Bazartete munisípiu Liquiçá,” Raimundo Mau informa ba Agência Tatoli iha ninia knaar, Caicoli, kinta ne’e.

Notísia relevante: SEA no MAP asina akordu revitalizasaun no espansaun kafé

Aleinde ne’e, iha mós viveiru kafé ne’ebé daudaun ne’e kuda ona iha Fatukeru, postu administrativu Railaco, munisípiu Ermera.

“Viveiru ne’ebé ita prepara ba tinan ida-ne’e hamutuk 700.000, ba viveiru konstrui 350.000 pés kafé no ai-mahon ba kafé hamutuk 350.000, sei kuda iha tinan ne’e bainhira tempu udan,” nia akresenta.

MAP mós asina ona akordu ho Asosiasaun Kafé Timór ba revitaliza kafé iha tinan ida-ne’e iha ektare 10.000 iha kada munisípiu.

Kooperasaun ne’ebé parte rua halo, parte SEA nia serbisu mak responsabiliza liuhosi programa dekarbonizasaun no iha semana rua kotuk SEA lansa ona iha Aileu, Baucau no Venilale.

“Hosi kooperasaun MAP no SEA ba revitalizasaun espansaun kafé ne’e iha orsamentu hamutuk millaun $6,4,” nia tenik.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!