iklan

EKONOMIA, BOBONARO, MUNISÍPIU

Xefe suku Tebabui kestiona prosesu rekrutamentu sensu uma-kain

Xefe suku Tebabui kestiona prosesu rekrutamentu sensu uma-kain

Xefe suku Tebabui, postu administrativu Bobonaro, Agostinho Soares Maia. Imajen espesiál.

BOBONARO, 15 setémbru 2022 (TATOLI)—Xefe suku Tebabui, postu administrativu Bobonaro, munisípiu Bobonaro, Agostinho Soares Maia, kestiona prosesu prosesu rekrutamentu ba sensu populasaun no uma-kain tanba aldeia rua hosi suku refere laiha enumeradór no supervizór.

Diresaun Jerál Estatistika rekruta ona enumeradór sensu uma-kain hamutuk 257 komposta hosi enumeradór 158 no supervizór 68 mak rekolla dadus kobre aldeia 193, suku 50 ho área mapeamentu enumerasaun 183 iha munisípiu Bobonaro.

Notísia relevante: Uma-kain 40% partisipa ona sensu populasaun 2022 iha Bobonaro

“Horibainhira rekruta ne’e ema barak maibé simu ne’e enumeradór ida ho supervizór ida prenxe ona mapa ida, agora mapa ida aldeia rua Atupae ho Uvas ne’e mak laiha ida,” nia informa ba Tatoli, liuhosi telefónika, kinta ne’e.

Xefe suku Tebabui ne’e informa ona ba koordenadór estatístika postu administrativu maibé deside enumeradór no supervizór hosi suku Lour mak atu ba kobre fali serbisu iha aldeia rua ne’e.

Nune’e autoridade lokál ne’e la konkorda no konsidera hadau oportunidade no direitu komunidade sira iha suku Tebabui nian.

“Ne’e ha’u la simu, tanba sensu ne’e idak-idak serbisu iha ninia suku, tanba saida mak ha’u-nia suku ne’e sarjana barak ba konkore ne’e nusá la simu, hakarak simu fali ema seluk, signifika rekruta ne’e la bazea ba planu no simu tuir família de’it karik,” nia kestiona.

Nune’e Xefe Suku ne’e husu ba Diresaun Jerál Estatístika Nasionál no munisípiu Bobonaro atu rezolve lalais problema ne’e no bainhira la hetan resposta iha tempu badak sei aprezenta ba Parlamentu Nasionál.

Nia dehan, daudaun ne’e aldeia Tubabui ho totál una-kain 200-resin mak ekipa sensu rekolla ona dadus no aldeia rua seluk seidauk ne’e ho totál uma-kain 182.

Hatán ba preokupasaun ne’e, Diretór estatístika munisípiu Bobonaro, Martinho Gusmão, klarifika, prosesu rekrutamentu ne’e bazea ba área enumerasaun.

“Ha’u hanoin informasaun hosi xefe suku Tebabui ne’e, tenke ser haree halo didi’ak, la’ós dehan laiha, tanba iha suku Tebabui dezeñu área enumerasaun rua, ne’ebé ekipa tékniku ami halo rekrutamentu jata ba iha suku Tebabui, enumeradór ida no supervizór ida, tanba sira-nia populasaun natoon no uma-kain natoon entaun ema na’in-rua ne’e mak kobre área enumerasaun rua ne’e hotu,” nia argumenta.

Nia parte la komenta kona-ba atu aumenta númeru enumeradór no supervizór kompeténsia iha diresaun jerál estatístika nasionál mak bele foti desizaun tuir nesesidade.

Notísia relevante: Uma-kain 280 iha Tebabui seidauk asesu eletrisidade

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!