DILI, 19 setembru 22022 (TATOLI)–Prezidente Federasaun Futeból Timor-Leste (FFTL), Francisco Martins da Costa Pereira Jerónimo, hateten, daudaun federasaun buka hela treinadór ida hodi troka treinadór selesaun nasionál, Fabio Maciel da Silva, ne’ebé mak rejiga-an ona foin lalais.
“Ho rejignasaun treinadór Fabio nian, iha impaktu tanba jogadór sira laiha treinadór maibé ida ne’e mak ami-nia kondisaun,” Atuál Ministru Asuntu Parlamentár no Komunikasaun (MAPKOMS) ne’e informa hafoin reuniaun ho Primeiru-Ministru (PM), Taur Matan Ruak, iha Rezidénsia Farol, segunda ne’e.
Notísia relevante: La simu saláriu, Fabio rejigna-aan hosi Treinadór futeból selesaun nasionál
Meski nune’e, nia dehan, FFTL nafatin iha esperansa ba jogadór sira tanba foin lalais partisipa iha jogu hetan rezultadu di’ak, ne’ebé konsege manán ho nasaun Hongkong.
“Ne’e atu dehan ladi’ak ona mós ba manán netik, ne’e mós ba ha’u sente kontente no fó parabéns ba sira tanba lakon ho sira seluk maibé manán ho seluk, ne’e hatudu katak ita iha progresu,” nia apresia.
Prezidente FIFA klarifika liután katak treinadór Fabio ninia kontratu sei ramata iha dezembru 2022 maibé deside rejigna-an tiha.
“Nia rasik hakotu nia kontratu, ne’e mós problema tanba osan, la’ós ami mak lakohi selu, osan ne’e iha AFC, nia hakerek karta ba AFC no FIFA no fó ona resposta kona-ba prosesu. Sira hatene hela prosesu, maibé sira dala barak lakohi atu hatene ho prosesu sira ne’e, sira-nia hakarak maka osan iha oin, laiha entaun ameasa ho rejigna-an,” nia tenik.
Jornalista : Antónia Gusmão
Editora : Julia Chatarina
