DILI, 19 setembru 2022 (TATOLI)–Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, hateten, Primeiru-Ministru (PM), Taur Matan Ruak, husu atu kontinua diálogu komunitáriu ho populasaun hodi rona preokupasaun no difikuldade sira.
“Ha’u relata ba Primeiru-Ministru atividade ministériu nian relasaun ho serbisu sira ne’ebé maka durante ne’e ami halo, liuliu vizita sira ne’ebé ami halo ba suku ho atividade Governu iha komunidade nia le’et ka diálogu komunitáriu, ami simu mensajen hosi xefe suku no komunidade katak atividade ne’e labele para, tenki kontinua ba hasoru sira, entaun Primeiru-Ministru aseita ho ida-ne’e no husu atu ami atu kontinua,” Ministru hateten hafoin hasoru Xefe Governu iha Rezidénsia Farol, segunda ne’e.
Notísia relevante: Programa ‘Naroman ba Suku’ atu promove koñesimentu komunidade ba asaun governativa
Governante ne’e dehan, MAPKOMS liuhosi programa Naroman ba Suku harii ona sentru informasaun, ne’ebé inisiativa ne’e hetan apresiasaun hosi Xefe Governu tanba liuhosi meiu ne’e komunidade bele hetan informasaun, liuliu programa governu nian.
“Partisipasaun komunidade iha diálogu komunitáriu entre Governu no komunidade ne’e másimu tebes tanba ami observa besik rihun mak partisipa, sira hotu nia preokupasaun maka saúde, edukasaun, estrada, bee-moos, eletridade, no agrikultura. Tanba reprezentante hosi ministériu hotu entaun sira tau nota kedas balun rezolve kedas iha tempu badak,” nia akresenta.
Entretantu, MAPKOMS iha programa ida naran Naroman ba Suku, ne’ebé programa ne’e Governu halo diálogu ho komunidade iha suku ida, harii mós sentru formasaun, no oferese ekipamentu informátika, nune’e bele transmite preokupasaun komunidade lokál ba nasionál.
Jornalista : Antónia Gusmão
Editora : Julia Chatarina
