HEADLINE, KAPITÁL, NASIONÁL

Ingrid Bucens husu Governu realiza promesa atribui sidadania ba Max Stahl nia oan

Ingrid Bucens husu Governu realiza promesa atribui sidadania ba Max Stahl nia oan

Jornalista Agência Tatoli, Filomeno Martins halo entrevista eskluziva ho Espoza Saudozu Max Stahl, Ingrid Bucens, iha edifísiu AMRT, sesta (16/12). Imajen Tatoli/Anito Soares

DILI, 20 setembru 2022 (TATOLI)–Espoza saudozu Max Stahl, Ingrid Bucens, tersa ne’e, akompaña hosi nia-oan na’in-rua, Leo Oscar Michael Stahl Wener no Malin Maria Stahl Wener, hasoru malu ho Primeiru-Ministru (PM), Taur Matan Ruak, hodi konfirma fali promesa Governu nian ba atribuisaun sidadania ba saudozu Max Stahl nia-oan.

“Ha’u ho ha’u-nia oan na’in-rua mai hasoru Primeiru-Ministru hodi ko’alia kona-ba oinsá atu prosesu oan-sira nia nasionalidade Timór ne’ebé hanesan Governu promete ba Max Stahl,” Ingrid Bucens, hateten hafoin hasoru malu ho Xefe Governu iha Rezidénsia Farol.

Notísia relevante: Edifísiu CASMTL ho kondisaun lapermite asegura obra jornalístiku Max Stahl

Nia dehan, família Max Stahl sente onra bainhira Governu oferese sidadania maski saudozu-nia oan sira mós iha nasionalidade estranjeiru.

“Sira (oan) mós iha nasionalidade estranjeiru tanba sira moris iha Austrália, nia pai ema Inglatera, maibé Timor-Leste hanesan ami-nia uma desde sira kiik loos to’o sai boot ona. Leo Oscar Michael Stahl Wener tinan 16 no Malin Maria Stahl Wener idade 13,” nia akresenta.

Daudaun ne’e oan sira sira hela iha Austrália tanba hala’o hela estudu.

Biban hanesan, espoza saudozu jornalista seniór ne’e atualiza ba Xefe Governu ligadu ho preparasaun ba transformasaun Sentru Audivizuál Max Stahl Timor-Leste (CASMTL) ba Institutu Públiku.

“Ha’u ko’alia ho Primeiru-Ministru kona-ba prosesu ne’ebé la’o hela kona-ba fundasaun ne’ebé eziste agora atu muda ba institutu públiku, mai update ida-ne’e hosi ami-nia parte, bainhira mak atu realiza ida-ne’e ha’u ladún hatene ninia prosesu maibé dokumentu kuaze prontu ona,” nia subliña.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!