DILI, NASIONÁL

Xefe suku Motael husu Governu aselera distribui cesta bázika ba populasaun

Xefe suku Motael husu Governu aselera distribui cesta bázika ba populasaun

Atividade distribuisaun Cesta Bázika faze daruak. Imajen/MTKI

DILI, 21 setembru 2022 (TATOLI)–Xefe suku Motael, postu Administrativu Vera Crus, munisípiu Dili, Luis António Viegas, husu Governu liuhosi Ministériu Turizmu Komérsiu Indústria (MTCI) atu aselera distribuisaun cesta bázika tanba povu ezije beibeik no hein kleur tebes ona.

Notísia Relevante: MTKI hahú distribui Cesta Bázika ba komunidade Ataúro

“Ha’u husu Governu liu-liu Ministériu Turizmu Komérsiu Indústria atu aselera lalais prosesu ba programa cesta bázika tanba ita-nia povu sira mai ezije ami katak bainhira mak simu cesta bázika,” Luis António Viegas hateten ba Agência Tatoli, iha nia kna’ar fatin, Motael, Dili, kuarta ne’e.

Ho nune’e, povu labele ezije no husu hela de’it ba autoridade lokál sira entaun presiza Governu aselera, se lae povu mai dehan katak autoridade lokál sira bosok no la hatudu realidade.

“Governu halo abertura iha fulan kotuk liubá maibé ninia kontinuasaun ne’e paradu no povu hosi suku Motael nian ne’e mai husu bainhira mak simu no kle’ur loos ne’e, keta bosok ita de’it karik. Tanba ne’e, ha’u hanesan autoridade lokál sujere atu MTCI halais konkursu ne’e, nune’e bele fahe ona sesta bázika ne’e,” nia dehan.

Xefe família iha suku Motael ne’ebé direitu atu simu cesta bázika ne’e hamutuk 1.293 no totál populasaun hamutuk 6.752, ne’ebé kompostu hosi feto na’in-3.390 no mane hamutuk na’in-3.362

Xefe suku Caicoli, Hipólito Ximenes, hateten to’o agora suku ne’e rasik seidauk simu informasaun ida kona-ba programa cesta bázika ne’e.

“Programa Cesta Bázika ba faze daruak ne’e to’o agora ami seidauk rona no simu informasaun hosi Governu, mezmu Governu rasik halo abertura iha postu administrative Dom Aleixo nian,” Xefe suku ne’e hateten.

Autoridade lokál ne’e dehan ida-ne’e dever no kompeténsia Governu nian no bainhira mak distribui ne’e parte suku Caicoli hein de’it.

“Ami hein de’it bainhira mak distribui sesta bázika ne’e, ami hein de’it maibé bainhira halo ona abertura katak povu sira sei hetan sesta bázika no ami fiar no hein katak sei simu iha tempu ruma,” nia dehan.

Xefe família iha suku Caicoli hamutuk 1.161, ho totál populasaun hamutuk 6.000-resin.

Notísia Relevante:  Abitante Ponilala 4.906 simu ona Cesta Bázika

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!