DILI, 22 setembru 2022 (TATOLI)–Estudante 19.137 hosi eskola 18, nível Ensinu Báziku Sentrál (EBC, sigla portugés) ho ninia filiál sira iha munisípiu Viqueque kontinua hetan merenda eskolár ba fulan-tolu, hahú hosi fulan-agostu to’o outubru.
Diretór Servisu Edukasaun Munisípiu Viqueque, Emídio Amaral, relata, programa nasionál ne’e maski kontinua realiza maibé ninia oráriu implementasaun ladún efetivu.
“Ita-nia oráriu implementasaun programa merenda eskolár iha eskola 18 ne’e la efetivu hanesan eskola iha munisípiu seluk. Durante fulan-tolu ninia implementasaun iha de’it loron-50 efetivu,” Diretór informa ba Agência Tatoli via telefónika, kinta ne’e.
Notísia relevante: Edukasaun Baucau hahú programa merenda eskolár faze daruak
Ministériu Edukasaun Juventude no Desportu (MEJD) hetan alokasaun $217.275 ba programa ne’e inklui mós osan selu fornesedór ho montante $17.550.
Fasilidade iha dapur hodi apoiu programa mai hosi inisiativa eskola tanba Governu la prevee osan ba item ne’e.
“Entaun eskola buka meiu hodi prepara dapur simples ruma hodi tulun inan-aman sira ne’ebé prepara merenda eskolár ba estudante sira,” nia tenik.
Jornalista : Tomé Amado
Editora : Julia Chatarina
