NASIONÁL, POLÍTIKA

MAKLN-MTCI selebra akordu sítiu turístiku rezisténsia iha Timor-Leste

MAKLN-MTCI selebra akordu sítiu turístiku rezisténsia iha Timor-Leste

Ministru Asuntu Kombatente Libertasaun Nasionál, Júlio Sarmento da Costa "Meta Mali". Imajen/Egas Cristovão..

DILI, 22 setembru 2022 (TATOLI)—Ministru Asuntu Kombatente Libertasaun Nasionál (MAKLN), Júlio da Costa “Meta Mali”, hateten MAKLN ho Ministériu Turizmu Komérsiu no Indústria (MTCI) selebra akordu ka asin nota entendimentu (MoU) sítiu turístiku rezisténsia iha Timor-Leste.

Governante ne’e hatutan, MAKLN iha obra ketak ida-ne’ebé ko’alia kona-ba vida funu tinan 24 nia laran, nune’e fatin istóriku sira presiza proteje.

“Ha’u agradese tanba MTCI bele hakat no kolabora malu, atu sira bele foti medida ba fatin istóriku sira. Tanba ita-boot sira mós hatene katak ko’alia kona-ba turizmu la’ós ko’alia de’it turizmu istóriku, maibé iha kulturál, relijioza,” Meta Mali hateten ba jornalista sira, hafoin asina MoU, iha MTCI, Faról, Dili, kinta ne’e.

Tanba ne’e , nia dehan, bainhira simu konvite hosi MTCI hodi diskute kontribui ba dezenvolvimentu sitiu istóriku rezisténsia nian iha Timor-Leste.

“Ami diskute, ami ko’alia ona buat barak. Ami konvensidu atu bele kontribui hodi bele sai nota entendimentu ida, nunee bele sai futuru aban bainrua nian,” nia dehan.

Ministeriu rua sei serbisu hamutuk ba fatin istóriku sira iha Timor-Leste ne’ebé sei prepara atu bele sai futuru ba nasaun ne’e nian.

“Ami identifika fatin barak iha Timor laran tomak, ha’u sura la to’o. Funu hahú hosi Batugade, tama mai tinan 24 kuaze Timor Laran tomak fatin sira-ne’e, sai fatin istóriku, iha foho leet, fatin ne’ebé mak maun Xanana subar ba, maun Taur Matan Ruak, Conis no seluk tan,” nia esplika.

Ministru Turizmu Komérsiu no Indústria, José do Carmo da Silva hateten, MTCI nia kna’ar mak hanesan halo diversifikasaun setór produtivu sira.

“Ita-boot sira hatene atu diversifika setór produtivu sira ein partikulár iha setór turizmu tanba ita-nia nasaun iha poténsia bo’ot ba turizmu, nune’e ohin MTCI no MACLN asina MoU hodi bele hametin Instituisaun rua ne’e bele dezenvolve iha setór turizmu istória rezistênsia tanba istória Timor-Leste úniku ne’ebé lahanesan ho nasaun sira seluk,” nia dehan

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!