iklan

NASIONÁL, KAPITÁL

Atribuisaun prémiu “Suku Moos hosi Lixu-ALFA” iha faze atu halo avaliasaun

Atribuisaun prémiu “Suku Moos hosi Lixu-ALFA” iha faze atu halo avaliasaun

Inundasaun iha sidade Dili haree hosi leten a’as. Imajen/Machel Silveira

DILI, 28 setembru 2022 (TATOLI)—Diretór Servisu Munisipál Agua Saneamentu no Ambiente atuál Prezidente Komisaun ba Komemorasaun Dili Day, Hermínio Moniz Ribeiro, informa prosesu Autoridade Munisípiu Díli (AMD) sei atribui prémiu ba suku ne’ebé moos hosi lixu no ALFA (Área Livre soe Foer Arbiru).

Notísia Relevante:AMD sei fó prémiu ba suku ne’ebé moos hosi lixu-ALFA 

Daudaun ne’e iha faze atu halo avaliasaun ba suku sira iha Postu Administrativu lima (5) iha Munisípiu Dili, ne’ebé tuir planu prémiu “Suku Moos hosi Lixu no ALFA ne’e sei anúnsia iha Dili Day ka aniversáriu Sidade Dili ne’ebé kada tinan selebra iha kada loron 10 fulan-outubru.

“Ekipa ida ho naran seksaun suku moos (limpu) no ALFA, sira tun ona ba terrenu no halo ona kolesaun dadus hosi suku sira hotu no agora hein de’it sira atu halo avaliasaun. Entaun, bainhira sira halo avaliasaun mak ita foin hatene, sé mak sai primeiru lugar, segundu no terseiru lugar,” Hermínio Moniz Ribeiro hateten ba Agência Tatoli, iha nia kna’ar fatin, Dili, kuarta ne’e.

Ekipa seksaun suku moos (limpu) no ALFA durante ne’e halo identifikasaun ba suku sira iha postu administrative lima (5) iha munisípiu Dili mak hanesan postu administrativu Cristo Rei, Nain Feto, Vera Crúz, Dom Aleixo no Metinaro.

“Iha semana ne’e, bainhira avaliasaun ramata, ita hein de’it rezultadu atu bele anúnsia ona iha 10 outubru kona-ba loron Dili Day (aniversáriu sidade Dili), ba suku sira-ne’ebé sai primeiru lugar, segundu no tereseiru lugar. Hosi ne’e, ita bele enkoraja ona suku sira iha Dili no bele sai mós ezemplu ida ba suku sira seluk. Aleinde ne’e, ita mós bele kontinua iha kada tinan, atu nune’e suku sira bele iha konxiénsia entermus suku limpu (moos),” nia esplika.

Jornalista : Nelia Fernandes

Editór       : Cancio Ximenes

 

iklan
iklan

Leave a Reply

iklan
error: Content is protected !!