iklan

NASIONÁL, KAPITÁL

Dom Virgílio Kardeál enkoraja timoroan partisipa sensu populasaun 2022

Dom Virgílio Kardeál enkoraja timoroan partisipa sensu populasaun 2022

Pesoal entrevistadór sensu populasaun, dada-lia ho Dom Virgílio Kardeal do Carmo da Silva, SDB, ne’ebé akompañadu hosi Diretór Jerál Estatístika, Elias dos Santos Fereira. Imájen Tatoli/Nelia Fernandes.

DILI, 28 setembru 2022 (TATOLI)—Arsebispu Arkidioseze Metropolitana Dili, Dom Virgilio Kardeál Do Carmo da Silva, SDB, kuarta ne’e, enkoraja sidadaun timoroan hotu iha territóriu laran tomak atu partisipa iha sensu populasaun 2022.

Notísia Relevante: Uma-kain 21,6% iha territóriu partisipa ona sensu populasaun 2022

Ekipa sensu populasaun 2022 hasai retratu hamutuk hafoin hala’o entrevista ho Dom Virgílio Kardeal do Carmo da Silva, SDB, ne’ebé akompañadu hosi Diretór Jerál Estatístika, Elias dos Santos Fereira. Imájen Tatoli/Nelia Fernandes.

“Ohin, ha’u kontente tebes tanba liuhosi pesoál sensu populasaun 2022 nian, ha’u halo tiha ona ha’u-nia sensu. Aproveita oportunidade ne’e mós hakarak enkoraja sidadaun hotu-hotu hakaas an atu fó netik tempu uitoan, nune’e ita-nia servisu-na’in sira ne’ebé hala’o sensu populasaun ne’e bele fasilita sira halo lalais sensu,” Dom Virgilio Kardeál Do Carmo da Silva, hateten hafoin partisipa sensu populasaun iha rezidénsia ArqueEpiskopál Lecidere, Dili, kuarta ne’e.

Tanba, Dom Virgílio Kardeál hateten, obstakulu ida-ne’ebé atu fasilita lalais halo sensu populasaun ne’e dala ruma to’o iha uma ema laiha no uma taka metin, entaun buat sira-ne’e hotu sai obstakulu ba pesoál sensu nian atu aselera lalais sensu populasaun iha rai-laran.

Sensu populasaun 2022 ne’e importante tebes atu bele hatene kona-ba estatistika populasaun Timor-Leste no buat seluk ne’ebé relasiona ho natureza sensu nian rasik.

“Tanba ne’e, ha’u-nia parabéns ba ekipa sira-nia servisu ne’ebé to’o agora rona katak la’o kuaze 93% ona ba ita-nia sensu iha rai-laran. Maibé, mós sei iha difikuldade uitoan, hanesan ohin dehan dala barak sei hetan familia balun laiha fatin atu bele hala’o didiak sensu ida ne’e. Tanba ne’e, enkoraja atu ita husu koolabora ho inisiativa ida-ne’e, tanba sensu ne’e la’ós ba ema ida-nia di’ak maibé ba timoroan no nasaun nia di’ak,” Amo Salesiano ne’e hateten.

Hosi igreja nia haree no pontu de vista katak populasaun nia moris agora kompara ho sensu populasaun 2015, liu-liu halo komparasaun kona-ba kondisaun sosio ekonómiku ho tinan 10 liubá mai to’o agora iha mudansa.

“Sem duvida, bainhira ita haree kona-ba kondisaun liu-liu kondisaun sosio ekonómiku povu Timor nian, ita haree no ita kompara ba tinan 10 liubá mai to’o agora iha mudansa no hahú iha melloramentu. Ida-ne’e la dehan katak iha ita-nia rai laiha ona mukit maibé sei iha ema ki’ak barak hela,” nia dehan.

Tanba, mukit iha Timor-Leste sei barak nafatin, la’os de’it iha foho maibé iha sidade mós dala barak sei hetan família balun ne’ebé loron ida labele han dala tolu. Tanba, iha família balun dala ruma loron ida tenke kesi kabun atu han dala ida tanba meiu la to’o.

“Tanba ne’e, hanoin sensu ne’e mós sai sasukat di’ak ida ba timoroan hotu atu ita bele hatene. Se lae, dala barak ita ko’alia no haree hosi li’ur de’it maibé ita la bazea ba faktu ne’ebé reflete realidade ba povu no rai ida-ne’e nian. Tanba ne’e, hanoin buat ne’ebé ha’u ko’alia hosi haree de’it, maibé buat ne’ebé sei loos liu mak hosi sensu mak sei revela no hatudu lolos kona-ba situasaun sosio ekonómiku ba povu no rai ida-ne’e nian, depois ita-nia tinan 20 ukun rasik an,” nia dehan.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!