iklan

HEADLINE, MUNISÍPIU, VIQUEQUE

Kooperativa KTM Viqueque prodús ai-lia sai rebusadu 

Kooperativa KTM Viqueque prodús ai-lia sai rebusadu 

Rebusadu ai-lia ne’ebé grupu kooperativa KTM prodús. Imajen Tatoli/Vitorino Lopes da Costa

VIQUEQUE, 28 setembru 2022 (TATOLI)–Kooperativa Kréditu Tane Malu (KTM), iha aldeia Naheboruk, suku Uma-Uain Kraik, postu administrativu Viqueque Vila, munisípiu Viqueque, hahú prodús rebusadu ho matéria produtu lokál ai-lia.

“Ami daudaun ne’e prodús hela rebusadu uza produtu ai-lia no ami sei halo promosaun iha Dili iha setembru,” Koordenadora KTM, Jelaurina Nunes Fernades, hateten ba Agência Tatoli, iha ninia knaar fatin, iha Naheboruk, kuarta ne’e.

Kooperativa KTM sosa produtu ai-lia tonelada ida hosi grupu agrikultór sira, nune’e balun fa’an no balun prodús rebusadu.

“Ami fa’an rebusadu musan ida $0,10 no prodús dahuluk to’o $10 nian. Ami hahú introdús ba Embaixada sira iha Timor-Leste no daudaun ne’e iha ami-nia armazen hela rebusadu ho folin $20 maka atu ba halo promosaun ba loja sira iha Dili,” nia tenik.

Notísia relevante: Kooperativa Kréditu Tane Malu Viqueque hahú prodús mina-sona

Tuir nia, kooperativa kria ona planu bainhira halo promosaun hotu kada fulan sei prodús rebusadu to’o atinje $100 ba leten.

“Ami-nia planu ba oin sei prodús rebusadu barak liután hodi responde ba nesesidade merkadu. Rebusadu ninia folin satisfas ba ami, nune’e ami sei esforsu hodi prodús rebusadu ho kuantidade boot,” nia dehan.

Daudaun ne’e Kooperativa KTM prodús ona produtu tipu haat hanesan ai-lia u’ut, mina-nuu no kripik.

“Hosi produtu tolu ami hetan ona rendimentu $750, durante maiu to’o agostu. Hosi rezultadu sira-ne’e balun ami sosa filafali materiál prima hodi prodús fali produtu,” nia informa.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!