iklan

NASIONÁL

Selebra loron mundiál asesu informasaun, CEPAD lansa filme “Ha’u-Nia Direitu atu Hatene”

Selebra loron mundiál asesu informasaun, CEPAD lansa filme “Ha’u-Nia Direitu atu Hatene”

Diretór Ezekutivu CEPAD, João Boavida. Imajen Tatoli/Egas Cristóvão.

DILI, 28 setembru 2022 (TATOLI)—Sentru Estudu ba Pás no Dezenvolvimentu (CEPAD, sigla Portugés) hamutuk ho Prezidente Parlamentu Nasionál, Aniceto Guterres Lopes, selebra loron Internasional Universal Asesu ba Informasaun iha loron 28 setembru ne’e hodi lansa filme “Ha’u-nia direitu atu hatene”.

Diretór Ezekutivu CEPAD, João Baovida, hateten selebra loron internasionál univesál atu asesu informasaun, hetan apoia tomak hosi Uniaun Europeia no prezidente Parlamentu Nasionál.

“Objetivu atu hakbiit sensibilidade ba povu tomak nian, tanba ne’e iha diretu ba informasaun no ita hotu-hotu atu bele liuhosi informasaun bele hadi’a ita-nia moris loro-loron nian. Bainhira ita hetan informasaun hosi órgaun relevante Estadu nian, bele hadi’a ita-nia moris iha komunidade no nível munisipál, nível nasionál no mós iha mundu,” Diretór Ezekutivu ne’e dehan jornalista sira, iha Arkivu Muzeu no Rezisténsia Timorense (AMRT), Dili, kuarta ne’e.

Loron ohin importante tanba ida-ne’e dala barak ko’alia kona-ba direitu ba liberdade asesu ba informasaun, ne’ebé konsagra iha artigu 40 konstituisaun RDTL nian.

“Atu dehan de’it sidadaun hotu-hotu iha direitu hodi hetan informasaun no mós iha direitu atu expresa ita-nia hanoin. Maibé dala barak ita-nia opiniaun ne’e la hetan informasaun ne’ebe klaru. Nune’e, atu informa fali dezisaun ne’ebe ita hakarak atu foti, ami hakarak servisu besik liu PN liu-liu povu tomak ne’ebe hala’o prosesu tomak iha Timor laran tomak,” nia dehan.

Prezidente Parlamentu Nasional (PN), Aniceto Longuinhos Guterres Lopes hateten, direitu atu hatene infomasaun ne’e konsideradu direitu fundamentál iha sosiedade demokrátiku, no sai aspektu esensial tebes ba ezersísiu sidadania no politika iha estadu direitu demokrátika.

Rekoñesimentu asesu ba informasaun ida-ne’e hosi organizasaun ONU liuhosi asembleia jerál Estadu Unida ba dala-74, ne’ebé proklama loron 28 fulan setembru nu’udar loron internasionál asesu ba informasaun.

Nune’e, Timor-Leste hahú ona selebra direitu ba liberdade ko’alia no direitu asesu informasaun ne’e hetan garantia hosi konstituisaun RDTL, artigu 40 ba konstituisaun RDTL, iha tinan 2015.

”Tanba ne’e atu fó hanoin tinan ida-ne’e PN no povu Timor Leste komemora tinan 20, konstituisaun RDTL,” nia dehan.

Timor-Leste mós asina no ratifika ona tratadu internasionál importante rua relasiona liberdade asesu informasaun kona-ba direitu no polítika konvesaun ba Nasaun Unida nia kontra korrupsaun.

“Ita adopta no atu informa di’ak liután ho ita-nia rekoñesimentu kona-ba asesu informasaun, nu’udar direitu umanu ba ema ida-idak nian. Tanba ne’e sai direitu umanu nesesáriu tebes katak poder públiku ita sai transferénsia liu, kona-ba saida mak poder ne’e halo no asaun hosi polítika sira-ne’ebé eleitu direitu hosi sidadaun rasik,” nia hateten.

Jornalista :  Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!