DILI, 03 outubru 2022 (TATOLI)–Prezidente Federasaun Futeból Timor-Leste (FFTL), Francisco Martins da Costa Pereira Jerónimo, hateten, bainhira Timor-Leste la partisipa iha jogu kualifikasaun kopa Asian Football Confederation (AFC) under 17 (U-17) iha Baharain mós laiha problema tanba laiha sansaun.
“Tinan ne’e bainhira ita la tuir, tinan oin bele tuir laiha problema, no laiha mós sansaun tanba jogu internasionál ita tuir dala barak loos ona no ba AFC Timor-Leste partisipa dala-tolu ona, tuir estatutu AFC mínimu tenki partisipa jogu internasionál rua iha tinan ida, maibé ita liu tiha ona. Tanba ne’e jogu tinan ne’e Timor-Leste la partisipa laiha impaktu buat ida,” Prezidente FFTL hateten hafoin relata serbisu Ministériu Asuntu Parlamentár no Komunikasaun Sosiál (MAPKOMS) ba Primeiru-Ministru, iha Rezidénsia Farol, segunda ne’e.
Nia esplika, iha razaun balun hodi FFTL deside kansela partisipasaun Timor-Leste iha jogu ne’e.
“Hakarak esklarese liután razaun kanselamentu mak fulan-rua liubá ami hahú prosesu atu buka de’it billete viajen hosi ne’ebé, ami presiza halo tanba tenke iha koutasaun, ha’u esplika ba inan-aman jogadór sira nian katak, bainhira hahú koutasaun hosi ajénsia fa’an billete sira iha Timór laran, koutasaun sira mai laiha ida mak la’o tuir normál, koutasaun sira ne’e ninia presu ne’e a’as hotu kedas, hahú hosi $180.000 to’o $200.000, ida-ne’e ha’u hanoin ita tenke realístiku, ita labele obriga malu,” nia akresenta.
Notísia relevante: FFTL deside la partisipa kualifikasaun kopa Ázia U-17
Osan ne’ebé prevee hosi FIFA hodi sosa billete ba jogadór hamutuk 31 ho totál $80.000, enkuantu folin billete ajénsia sira fa’an entre $180.000 to’o $200.000.
Ligadu ho presu billete, direjente FFTL konsege kontaktu halo ho FIFA, maibé dehan ne’e presu ida la normál.
“Osan ne’e FIFA mak aloka duni mai, osan iha maibé tenke halo jestaun loloos, sira hatán maka foti kuandu sira la hatán, sira mós la obriga-an atu ba hodi soke morru. Tanba FIFA dehan presu ne’e a’as liu no sira husu ami buka dalan seluk. Tanba ne’e ha’u rasik hakerek karta ba AFC hodi husu atu prevee billete tanba sira iha mós iha travel agency, besik semana rua fó fali resposta mai katak sira mós labele,” nia tenik.
FFTL mós ko’alia fali ho Federasaun Kazakhstan hosi husu sira ajuda atu prevee billete ne’e, fofoun sira hateten bele, maibé ikus mai labele.
“Lakleur sira dehan fali aviaun bele tula hotu jogadó sira no tenke ketak-ketak, tanba aviaun nakonu hotu. Entaun ami hanoin bá-mai ho tan jogadór sira seidauk iha esperiénsia ba iha Kazakhstan, bainhira sira ba iha ne’ebá hasoru problema sé mak atu rezolve tan problema ne’e, hansan Prezidente ha’u hanoin dook ona, ha’u lakohi ha’u-nia jogadór sira ba hetan problema,” nia subliña.
Kada tinan FIFA apoia osan ba FFTL millaun $1 no AFC $500.000, maibé fahe ba administrasaun no infraestrutura.
Kualifikasaun kopa AFC U-17 sei realiza Baharain iha tinan 2023
Hosi totál nasaun 44 ne’e fahe ba grupu A too J ne’ebé kada grupu nasaun lima, balun haat no Timor-Leste okupa iha grupu H hamutuk ho Tajikistaun, Afganistaun no Mongolia.
Nasaun hirak-ne’e mak iha grupu A kompostu hosi, Japaun, Jordan, Síria, Filipina no Turkmenistaun. Grupu B kompostu Indonézia, Malázia, Palestina, Guam no UAE. Grupu C Oman, Iraque, Qatar, Lebanon no Bahrain.
Enkuantu, grupu D mak Índia, Arabia Saudita, Myanmar, Maldives no Kuwait no grupu E mak Iémen, Bangladesh, Singapura no Butaun.
Grupu F mak Tailándia, Vietname, Xina Taipe no Nepali. Grupu G mak Austrália, Repúblika Populár Xina, Kambodia no nasaun ida sei iha prosesu nia laran.
Grupu I kompostu hosi Iraun, Hongkong, Kyrgyz Republic no Laos. Grupu J mak Repúblika Korea, Brunei Darusalam, Uzbekistaun no Sri Lanka.
Jornalista : Antónia Gusmão
Editora : Julia Chatarina
