Estudante 18.838 iha Liquiçá kontinua hetan merenda eskolár
DILI, 05 outubru 2022 (TATOLI)–Estudante ensinu pre-eskolár no ensinu báziku na’in-18.838 iha munisípiu Liquiçá kontinua hetan apoiu merenda eskolár ho kustu $92.491.
“Programa ne’e kontinua la’o hanesan baibain ho orsamentu ne’ebéaloka iha semestre daruak ikus hamutuk $92.491. Ita iha estudante 18.838 kompostu hosi pre-eskolár 2.046 ho orsamentu $8.811 no ensinu báziku 16.792 ho orsamentu $83.680,25,” Diretór Servisu Edukasaun Munisípiu Liquiçá, Carlos Lopes, informa ba Agência Tatoli, via telefónika, kuarta ne’e.
Notísia relevante: Estudante 19.137 Viqueque kontinua hetan merenda eskolár maski la efetivu
Programa merenda eskolár ba eskola nível rua ne’e la’o la hanesan, iha pré-eskolár implementasaun iha loron efetivu 48 no ensinu báziku loron efetivu 22.
“Desizaun sira ne’e hosi ministériu ami kumpre de’it saida mak deside ona,” nia akresenta.
Tuir Diretór, menu ba merenda eskolár kontinua mantein nafatin ho desizaun ne’ebé maka deside ona hosi Ministériu Saúde, enkuantu parte munisípiu no eskola haree labarik sira hodi bele han hahán sira.
“Ita la halo mudansa ba menu maibé ita muda de’it maka fornesimentu hahán kada loron ba labarik sira atu sira labele baruk han hahán,” nia tenik.
Jornalista : Tomé Amado
Editora : Julia Chatarina
