COVALIMA, 06 outubru 2022 (TATOLI) – Konselho Nasional Seguransa Aihan no Nutrisaun Timor-Leste (KONSSANTIL) deskuti implementasaun programa merenda eskolar no problema má nutrisaun ba labarik sira iha munisípiu Covalima.
“Enkontru ohin Ita ko’alia konaba má nutrisaun, programa merenda eskolar no produsaun agrikultura. Maibé, foku liu deskuti konaba implementasaun merenda eskola ba estudante sira iha Covalima” Sekretáriu KONSSANTIL munisípiu Covalima, Reinaldo Moniz Coli hateten ba jornalista sira, iha salaun Administrador Munisípiu Covalima, sukaer-Laran, kinta ne’e.
Nia dehan, razaun KONSSANTIL foku deskuti implementasaun programa merenda eskolar bazeia ba monitorizaun no observasaun hosi Servisu Munisipal Seguransa Alimentar (SMSA) nota, fornesedór programa merenda eskolar la tuir kritéria ka menu ne’ebe iha.
“Observasaun husi SMSA nota katak fornesedór aí han ba estudante sira seidauk tuir kritéria ka menu ne’ebé iha, tanba iha eskola balun estudante sira nunka han hahan ne’ebé ho sabor hanesan semana-ida tenki han naan dala-ruma lá halo tuir maske sira hatene hela,” nia informa.
Durante hala’o enkontru membru KONSSANTIL sira mós rejista obstakulu no sei hato’o mós rekomendasaun ba administradór atu halo asaun konjunta nune’e bele redus númeru má nutrisaun iha Covalima.
Reprezentante Administradór Munisipiu Covalima, Francisco de Jesus Alves, reforsa implementasaun merenda eskolar nia hun lolos atu hamenus má nutrisaun tamba han ne’ebé fo bele hadia labarik sira nia nutrisaun
Jornalista : Celestina Teles
Editóra : Armandina Moniz
