iklan

EDUKASAUN, HEADLINE

Eskola São Pedro sai manan-na’in kompetisaun sertame tasa Avo Nana 2022

Eskola São Pedro sai manan-na’in kompetisaun sertame tasa Avo Nana 2022

Estudante sira partisipa kompetisaun sertame tasa Avo Nana 2022 iha salaun ESJ Santa Madalena de Canossa, Has-laran, Manleuana, sesta (07/10). Imajen/Espesiál

DILI, 07 outubru 2022 (TATOLI)–Eskola Ensinu Sekundáriu Jerál (ESJ) São Pedro Comoro hetan primeiru klasifikasaun iha kompetisaun sertame tasa Avo Nana 2022, hafoin halakon Eskola Seminário Menor Nossa Senhora de Fátima (SENOFA) Cristal no São José Operáriu, iha ámbitu komemorasaun aniversáriu líder karizmátiku, Kayrala Xanana Gusmão ba dala-76.

Prezidente Komisaun Organizadora tasa Avo Nana 2022, Miguel Manitelo, hateten, atividade sertame ne’ebé partisipa hosi eskola ensinu sekundáriu públiku no privadu hamutuk 16 ne’e finaliza di’ak tebes, ne’ebé hatudu ninia rezultadu ikus iha eskola haat tama iha faze finál.

“Ita realiza tan sertame nu’udar kontinuasaun atividade seluk hanesan jogu futsál, korru no vokál grupu ne’ebé maka remata ona, no ba oin ita sei kontinua tan ho atividade seluk hanesan poezia inklui atividade semináriu ne’ebé ita sei organiza ho universidade sira. Atividade sertame ne’e nu’udar eventu ida hodi fó motivasaun ba estudante hodi prepara-an di’ak liután iha futuru,” Prezidente Komisaun hateten iha salaun ESJ Santa Madalena de Canossa, Has-laran, Manleuana, sesta ne’e.

Notísia relevante: Eskola sekundáriu hamutuk 16 kompete sertame tasa Avo Nana 2022

Hosi faze finál atividade sertame nível ensinu sekundáriu ne’e hatudu katak Eskola ESJ São Pedro Comoro mak sai hanesan primeiru klasifikasaun ho valór 1.850, segundu klasifikasaun Eskola ESJ Colégio SENOFA ho valór 1.825, terseiru klasifikasaun Eskola ESJ São José Operáriu ho valór 1.350 no ikus maka eskola ESJ Cristal ho valór 1.150.

“Ekipa eventu sertame tasa Avo Nana antes ne’e tau ona konsentrasaun ba eskola ensinu sekundáriu públiku no privadu sira iha munisípiu Dili, tuir dadus eskola eziste ne’ebé iha Dili no rekolla hamutuk 22, maibé iha prosesu inskrisaun hetan de’it eskola 15 mak rejista, kompostu hosi eskola públika tolu no eskola privada 12,” nia haktuir.

Maibé tanba Eskola ESJ Laulara hosi munisípiu Aileu iha interese hakarak partisipa, entaun ekipa fó mós oportunidade hodi bele rejista, nune’e eskola hamutuk 16 maka kompete iha atividade ne’e.

Estudante Eskola ESJ São Pedro halo preparasaun di’ak

Iha fatin ketak, Adjuntu Diretór Eskola ESJ São Pedro Comoro, konsidera estudante sira bele sai vensedór tanba antes ne’e sira halo ona preparasaun di’ak durante semana rua nia-laran, enkuantu eskola hetan distribuisaun matéria hosi ekipa realizadora ho tempu limitadu tebes.

“Ita prepara estudante na’in-tolu hodi kompete iha atividade sertame bazeia ba matéria ne’ebé ekipa distribui ona mai ita, tanba matéria siénsia sosiál mak barak liu entaun ita prepara estudante mellór na’in-tolu, rua hosi siénsia sosiál no ida hosi siénsia teknolojia,” nia esplika.

Aleinde ne’e, parte Eskola ESJ São Pedro hili estudante na’in-tolu tuir sertame ho baze ba valór ezame períodu.

“Ita-nia estudante na’in-tolu ne’e hatudu prestasaun di’ak nune’e sira tama kritériu sira ne’ebé eskola deside bainhira atu tuir kompetisaun ruma. Estudante tenke matenek ka sai mellór klasifikasaun depois tenke iha mentál atu ko’alia. Entaun liuhosi rezultadu di’ak iha ezame períodu ne’e kuaze barak loos maibé sira na’in-tolu ne’e mak prenxe kritériu, entaun eskola deside sira maka reprezenta eskola,” nia tenik.

Kompetisaun realiza durante loron tomak, hahú hosi tuku 09:30 dadeer to’o kalan boot.

“Estudante na’in-tolu ne’e kontinua hatudu sira-nia kualidade iha kompetisaun nia laran no rezultadu ikus ne’ebé termina, hakarak hateten eskola fó parabéns ba sira na’in-tolu ninia esforsu,” nia orgullu.

Biban ne’e, Adjuntu Diretór Eskola husu ba ekipa responsável kompetisaun atu kontinua nafatin atividade sira hanesan ne’e hodi bele mellora di’ak liután estudante nia kapasidade no koñesimentu.

Eskola ne’ebé kompete iha sertame ne’e mak hanesan Eskola ESJ Sagradu Korasaun de Jesus Becora, ESJ Nikolau Lobato Comoro, ESJ São Pedro Comoro, ESJ Colégio São João Paulo II Be-dois, ESJ Santa Madalena de Canossa Has-laran, ESJ Colégio Paulo VI, ESJ Semináriu Nossa Senhora de Fatima, ESJ Colégio São Jose Operáriu Balide, ESJ Annúr, ESJ Nobel da Paz, ESJ Rainha da Paz, ESJ Finantil, ESJ Cafe de Dili, ESJ 10 dezembru Comoro no ESJ Laulara.

Estudante ne’ebé partisipa iha atividade ne’e kada grupu iha ema na’in-tolu, hosi grupu 16, ho totál estudante 48.

Prémiu ne’ebé ekipa prepara ona ba primeiru klasifikasaun hetan sertifikadu tasa Avó Nana 2022 no osan $350, segundu klasifikasaun sertifikadu tasa no osan $250, terseiru klasifikasaun sertifikadu tasa no osan $150, no kuartu klasifikasaun sertifikadu ho osan $75.

Matéria ne’ebé maka ekipa Avo Nana hamutuk ekipa juri sira antes ne’e prepara, foti hosi matéria siénsia no koñesimentu jerál hosi kontestu Timor-Leste nian ne’ebé maka ninia prosesu demokrátiku la’o hela, ne’ebé kompozisaun entre matéria siénsia no koñesimentu jerál 50:50.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!