iklan

EDUKASAUN, HEADLINE

Eskola sekundáriu hamutuk 16 kompete sertame tasa Avo Nana 2022

Eskola sekundáriu hamutuk 16 kompete sertame tasa Avo Nana 2022

Atividade tasa sertame Avo Nana 2022, iha salaun Eskola Canossa Has-laran, sesta (07/10). Imajen/Espesiál

DILI, 07 setembru 2022 (TATOLI)–Eskola ensinu sekundáriu públiku no privadu hamutuk 16 hosi munisípiu Dili no Aileu hetan oportunidade hodi partisipa iha eventu kompetisaun sertame tasa Avo Nana 2022.

Prezidente komisaun organizadora tasa Avo Nana 2022, Miguel Manitelo, hateten, atividade ne’e nu’udar eventu ne’ebé ekipa realiza ona iha ámbitu komemorasaun aniversáriu líder karizmátiku, Kayrala Xanana Gusmão ba da-76.

“Atividade sira seluk hanesan jogu futsál, koru no vokál grupu ramata ona, ohin ita realiza filafali sertame no semana oin ita sei kontinua realiza tan atividade poezia inklui atividade semináriu ne’ebé sei organiza ho universidade sira,” Prezidente Komisaun hateten iha serimónia abertura tasa Avo Nana, ne’ebé hala’o iha salaun Eskola Canossa Has-laran, sesta ne’e.

Notísia relevante: Estudante  Calixa hetan primeiru lugar ba kompetisaun sertame hosi SEII

Matéria ne’ebé prepara hosi ekipa responsável foti hosi matéria siénsia hanesan matemátika, koñesimentu jerál hosi kontestu Timor-Leste, tantu istória no prosesu demokrátiku ne’ebé maka la’o hela iha nasaun.

Matéria preparasaun sira konsentra liu ba eskola ensinu sekundáriu públiku no privadu sira iha munisípiu Dili, tanba ne’e dadus sira ne’ebé ekipa rekolla ona hosi eskola 22 maka eziste iha munisípiu Dili, maibé iha prosesu inskrisaun hetan de’it eskola 15 maka rejista inklui eskola públiku tolu no eskola privadu 12.

Ikus mai, Eskola ESJ Laulara hosi munisípiu Aileu hakarak partisipa, entaun ekipa Avo Nana mós fó oportunidade ba sira hodi bele rejista, ho nune’e eskola hamutuk 16 maka prontu ona kompete iha atividade sertame ne’ebé realiza iha loron 07 setembru 2022.

Portantu eskola sira ne’ebé kompete iha sertame ne’e kompostu hosi Eskola Ensinu Sekundáriu Jerál (ESJ) Sagradu Coração de Jesus Bekora, ESJ Nikolau Lobato Comoro, ESJ São Pedro Komoro, ESJ Colégio São João Paulo II Be-dois, ESJ Santa Madalena de Canossa Has-laran, ESJ Colégio Paulo VI, ESJ Semináriu Nossa Senhora de Fatima, ESJ Colégio São José Operáriu Balide, ESJ Annúr, ESJ Nobel da Paz, ESJ Rainha da Paz, ESJ Finantil, ESJ Café de Dili, ESJ 10 dezembru Comoro no ESJ Laulara.

Enkuantu, estudante sira ne’ebé partisipa iha atividade sertame tasa Avo Nana 2022 ne’e kada grupu iha na’in-tolu ho totál estudante 48, hosi eskola 16 ne’ebé partisipa iha atividade.

Prémiu ne’ebé ekipa prepara ona sei oferese ba grupu haat ne’ebé tama iha klasifikasaun, primeiru klasifikasaun sei hetan sertifikadu tasa Avo Nana 2022 inklui osan $350, segundu hetan sertifikadu tasa no osan $250, terseiru hetan sertifikadu tasa no osan $150, no kuartu hetan sertifikadu ho  osan $75.

“Eventu ne’e tenke kontinua nafatin atu nune’e bele fó nafatin motivasaun ba estudante sira hodi bele prepara-an di’ak liután iha futuru,” Prezidente komisaun dehan.

Eskola Laulara otimista tama kategoria klasifikasaun

Profesór iha Eskola Ensinu Sekundáriu Jerál (ESJ) Laulara, António de Jesus do Rego, ne’ebé lori estudante na’in-tolu kompete iha atividade sertame tasa Avo Nana 2022, otimista tama kategoria tanba estudante ne’ebé sira hili iha kapasidade kompete ho ekipa hosi eskola seluk.

“Ami-nia preparasaun di’ak tebes, maski seidauk bele garante hetan klasifikasaun maibé ami otimista sei tama iha kategoria, tanba estudante na’in-tolu kompostu hosi feto rua no mane ne’ebé reprezenta eskola ne’e iha kapasidade atu kompete,” Profesór hateten iha salaun Eskola Santa Madalena de Canossa Has-laran, sesta ne’e.

Nia dehan, razaun eskola hakarak partisipa atividade kompetisaun tanba hakarak sukat koñesimentu estudante kona-ba siénsia.

“Ami-nia eskola iha vontade hakarak kompete tanba estudante sira durante ne’e apreende barak, maibé ladún hetan oportunidade atu partisipa iha kompetisaun aberta sira, entaun sira labele sukat kapasidade entre sira ho eskola sira seluk,” nia tenik.

Profesór ne’e reforsa liután katak loloos bainhira haree ba jeográfikamente, eskola ne’e tama iha munisípiu Aileu maibé tanba estudante sira maioria mai hosi Dili, tanba ne’e dirijente eskola deside lori estudante sira kompete.

“Ami la’ós atu mai buka osan ka buka prémiu maibé atu koko kapasidade estudante, karik iha eventu ne’e maka Eskola Laulara la tama iha klasifikasaun ne’e hanesan oportunidade, maibé bainhira hetan klasifikasaun, ita orgullu boot no kontinua motiva estudante hodi bele apreende nafatin,” nia tenik.

Jornalista   : Tomé Amado   

Editora        : Julia Chatarina

iklan
iklan

Leave a Reply

iklan
error: Content is protected !!