Atleta Quénia okupa primeiru lugár iha Dili Internasionál Maratona 2022

DILI, 08 outubru 2022 (TATOLI)—Atleta hosi Quénia, Anderson Saitoti okupa primeiru lugár no Chesang Shelia Jepkosgel okupa segundu lugár hosi kategoria kilómetru 42 nível internasionál, ne’ebé hetan taxa rotativa no osan $2.000, iha eventu Dili Internasionál Maratona 2022.
Enkuantu, atleta timor-oan, Felisberto de Deus, okupa terseiru lugár hosi kategoria kilómetru 42 nível internasionál.

Anderson Saitote kontente bele hola parte iha atividade ne’ebé Estadu Timor-Leste halo hodi halibur joven hotu.
“Ha’u ho kolega Chesang Shelia Jepkosgel kontente tebes tanba sai manán-na’in ba taxa rotativa Dili Internasionál Maratona 2022. Ami-nia problema mak Timór nia klima manas tebes, maibé ami esforsu-an nafatin hodi sai vensedór,” Atleta hosi Quénia hateten ba Agência Tatoli, iha resintu Palásiu Prezidensiál, Bairru-Pité, sábadu ne’e.
Notísia relevante: PR husu partisipante Dili internasionál maratona halo ezersísiu di’ak

Iha fatin hanesan, Prezidente Komisaun Organizadora Dili Internasionál Maratona 2022 , Joel Alves Pereia, hateten, atividade ne’e inisia hosi Prezidente Repúblika, José Ramos Horta, ne’ebé deklara katak nafatin kontinua atividade desportu ba joven sira.
“Dili Internasionál Maratona ba tinan ne’e bele dehan sai hanesan eventu internasionál dahuluk iha parte desportu ne’ebé ita konsege loke Timor-Leste ba mundu hodi konvida ita-nia maluk sira hosi estranjeiru mai partisipa,” nia dehan.
Iha tinan ne’e númeru partisipante iha eventu ne’e hamutuk 1.300 resin, ne’ebé mai hosi nasaun Indonézia, Quénia, Singapura, no Timor-Leste.
Prezidente Repúblika, José Ramos Horta, sente kontente ho eventu ne’e tanba konsidera hanesan ezersísiu ida ba ema hotu atu hola parte.
“Preparasaun ida-ne’e fulan-rua nia laran, entaun tempu la sufisiente ba atleta sira, maibé ba oin ita halo preparasaun másimu liután, liu-liu iha fulan-dezembru ne’e sei halo tan kompetisaun ba prezépiu iha territóriu nasionál, ne’ebé hola parte iha kultura nasionál Timór nian,” Horta informa.
Teófilo Freitas okupa primeiru lugár kategoria kilómetru 10 paralímpiku

Teofilo Freitas ho kondisaun defisiénsia okupa primeiru lugár ho kategoria kilómetru 10 paralímpiku mane.
“Ha’u sente kontente hetan primeiru lugár iha eventu ida-ne’e, ha’u agradese tebes tanba bele fó espasu no oportunidade ba ami defisiénsia hodi envolve direita. Iha tinan-lima liubá realiza eventu Dili Internasionál Maratona maibé la fó espasu ba ami hodi kompete ho ami-nia maluk defisiénsia sira. Iha tinan ida-ne’e, ho grasa Maromak nian, hosi Prezidente Repúblika, José Ramos Horta, bele fó espasu hodi bele kompete direita,” nia dehan.
Nia dehan, eventu ne’e bele sai ezemplu ba atividade inkluzaun sosiál seluk hodi envolve ema ho defisiénsia sira.
“Ne’e sai hanesan matéria ida hodi prepara ba tinan oin mai bele hadi’a di’ak liután. Komisaun sira iha fuan hodi bele fó espasu ba ami bele envolve direta iha komisaun no iha parte rejistu naran nian. Ami kontente tanba fó mós espasu ba ami ho defisiénsia hodi kompete hamutuk ho ami-nia maluk defisiénsia,” nia tenik.

Atleta paralímpiku ne’ebe kompete iha kategoria kilómetru 10 mane no feto, maka Teofilo Freitas no Dircia Fatima Amaral Xavier, okupa primeiru lugár no hetan $1.000, Domingos Pereira Lobato no Henriqueta Dos Santos, okupa segundu lugár no hetan $750, Abel de Jesus Martins no Natercia Lemos dos Santos, okupa terseiru lugár no hetan $500, Jeconias Sampaio no Maria Lelita Gueteres, okupa kuartu lugár no hetan $350, Marcelino Barreto da Cruz no Alcina Bareto Martins, okupa kintu lugár no hetan $250.
Dili Internasionál Maratona 2022 hanesan eventu anuál ne’ebé inisia hosi Prezidénsia Repúblika ho koordenasaun hosi Governu no Federasaun Atletizmu Timor-Leste (FATL).
Kompetisaun ne’e ho kategoria tolu ho distánsia kilómetru 10 (ba ema ho defisiénsia), 21 (nasionál) no 42 (internasionál).
Eventu ne’e partisipa hosi entidade oin-oin hanesan estudante, labarik, ema ho defisiénsia, embaixadór, inklui komunidade internasionál.
Patrosinadór ba programa ne’e mak hanesan Timor Telecom, Telemor, Telkomcel, Air Timor, Dili Medical Center (DMC), Banku Nasionál Komérsi Timor-Leste no seluk tan.
Jornalista : Felicidade Ximenes
Editora : Julia Chatarina

