Ekipa unidade misaun apoiu Guiné-Bissau hahú halo resensiamentu eleitorál
DILI, 13 uutubru 2022 (TATOLI)—Xefe Unidade Misaun Apoiu Resensiamentu Guiné-Bissau, Acilino Manuel Branco, hateten ekipa téknika apoiu resensiamentu eleitorál iha Guiné-Bissau hahú servisu hodi halo resensiamentu eleitorál tinan 2022.
Notísia Relevante: Ekipa unidade misaun apoiu resensiamentu desloka ona ba Guiné-Bissau
“Ekipa téknika sei serbisu nafatin ho Gabinete apoiu tékniku ba prosesu eleitorál Guiné-Bissau nian atu haree kondisaun téknika, liuliu preparasaun ekipamentu resensiamentu eleitorál nian. Agora ne’e, ekipa unidade apoiu Guiné-Bissau halo hela resensiamentu eleitorál 2022,” Acilino Manuel Branco dehan Agência Tatoli, via WhatsApp, kinta ne’e.
Preparasaun resensiamentu eleitorál kontinua halo resensiamentu maibé prezensa ekipa ne’e nian atu reforsa de’it parte balun, liuliu produsaun roll ka blanco resensiamentu eleitorál nian.
“Ami-nia ekipa sei ajuda ekipamentu sira hodi hadi’a preparasaun eleisaun Guiné-Bissau nian,” nia dehan.
Responsável ne’e mós hatutan, ekipa ne’e rejista sentru atendimentu hamutuk 300 iha rejiaun sia (9) iha Guiné-Bissau no tuir kalendáriu ne’ebé estabelese ona.
Ekipa misaun apoia prosesu resensiamentu eleitorál hala’o mós sorumutu ho gabinete apoiu tékniku ba prosesu eleitorál Guiné-Bissau nian hodi diskute kona-ba parte balun durante apoiu hosi ekipa iha país ne’e, inklui mós Ministériu Asuntu territoriál no Poder Lokál, Komisaun Nasionál Eleisaun (CNE) no Primeiru-Ministru Guiné-Bissau.
Ho sorumutu ne’e, Primeiru-Ministru Guiné-Bissau Nuno Gomes Nabiam sente orgullu ho prezensa Estadu Timor-Leste nian atu apoia rejistu eleitór.
“Xefe Governu agradese ba ninia omologu tanba hatán ba pedidu Guiné-Bissau nian atu apoia eleisaun sira. Tanba ne’e, Primeiru-Ministru konsidera relasaun amizade entre nasaun rua dezde pasadu,” nia dehan.
Tuir nia, xefe ezekutivu ba ekipa misaun apoiu Gabinete Tékniku Apoiu ba Prosesu Eleitorál (GTAPE) ba Guiné-Bissau ne’e informa katak eleisaun iha Guiné-Bissau ne’e sei akontese iha loron 18 dezembru 2022.
Jornalista : Osória Marques
Editór : Cancio Ximenes
