DILI, 17 outubru 2022 (TATOLI)—Adjuntu Prezidente Autoridade Munisípiu Dili, António Moniz Clau, informa iha tempu udan monu rai ne’e Autoridade Munisípiu Dili sei halo sensibilizasaun ba komunidade ne’ebé hela iha fatin risku, hanesan hela iha mota ibun no foho lolon ne’e risku ba dezastre natural.
Notísia Relevante: Membru PN husu Governu tau atensaun vítima dezástre naturál territótoiu nasionál
“Munisípiu Dili nafatin, agora ita prepara atu kria ekipa konjunta ida atu halo sensibilizasaun no fahe informasaun ba ita-nia komunidade, liu-liu sira-ne’ebé hela iha fatin risku, hanesan mota ibun no foho lolon ne’ebé mak ita nota katak, tinan-tinan sempre hetan inundasaun, hanesan Kampung Alor, Bairry Pite, Hudi Laran no Hera. Agora ekipa ne’e ita fó ona ba Dirasaun Servisu Dezastre Naturál nian, atu prepara ekipa ne’e no iha tempu badak ita sei halo ssnsibilizasaun,” osielizasaun,” António Moniz Clau hateten ba jornalista sira, iha nia kna’ar fatin, Díli, segunda ne’e.
Tuir nia, ekipa ne’ebé Autoridade Munisípiu Dili prepara hodi halo sensibilizasaun ne’e sei akontese iha fulan outubru tanba iha novembru udan monu rai ona no daudaun ne’e mós udna monu rai sedu liu.
“Ita bele dehan outubru nia laran ita sei halo sensibilizasaun no ita labele ba tan novembru. Tanba iha novembru ne’e udan monu rai ona, maibé konforme ekipa ne’e ita forma lalais liu, ita sei tun ho lalais,” nia dehan.
Kona-ba karik mosu dezastre ruma Autoridade Munisípiu Dili prepara ona ai-han ruma atu responde ba apoiu vitima sira, nia afirma, dadaun ne’e munisípiu Dili prepara ona ai-han, hodi fó apoiu ba vitima sira bainhira mosu dezastre ruma iha tinan ne’e, munisípiu Dili preparadu.
Notísia Relevante: https://tatoli.tl/2022/07/04/apc-fo-apoiu-umanitariu-ba-vitima-dezastre-natural-hamutuk-363/
Jornalista : Nelia Fernandes
Editór : Cancio Ximenes
