Kazu osan rihun $130, Xanana Gusmão apresia serbisu SNI

DILI, 17 outubru 2022 (TATOLI)–Eis Primeiru-Ministru, Xanana Gusmão, apresia Serbisu Nasionál Intelejensia (SNI) nia servisu atu kontinua profisionál hodi investiga kazu osan rihun $130 ne’ebé pesoál balun tenta atu hala’o tranzasaun liu hosi aeroportu internasionál Nicolau Lobato, Comoro, foin lalais ne’e.
Notísia Relevante: Membru PN husu prosesa membru Governu interven serbisu investigasaun
“Kaer osan iha aeroportu, ha’u dehan ne’e mós jornalista balun husu mai ha’u lae, buat ne’e iha ona entidade instituisaun Estadu nian kaer buat ida-ne’e, husik sira mak la’o. Ita labele interfere no ita bele dehan tenke halo ida no ida ne’eba. Saida mak ha’u tenke dehan, ha’u apresia tebes atetude hosi polísia ne’ebé hala’o misaun ida-ne’e,” Xanana Gusmão hateten ba jornalista sira hafoin reuniaun ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, Dili, tersa ne’e.
Tuir Xanana, tanba ita kuandu ba Bali ka Jakarta ka ba ne’ebé sempre simu surat ne’ebé buat ne’e tuir lei Indonézia labele liu millaun Rp100, ne’e ita bele dehan rihun $10.
“Labele lori tama ba Indonézia, ida-ne’e lei Indonézia nian. Ne’ebé hanesan sidadaun ida, ha’u prontu se polísia Gastão halo ne’e tuir regra, tanba ita tama tiha Asean ita husik buat arbiru de’it ne’e ita la’os membru Asean, ne’ebé loos aproveita tama de’it Asean,” nia hateten.
Eis PM ne’e lamenta ho membru Governu balun halo intervensaun ba prosesu investigasaun liu-liu ba kazu.
“Iha ita-nia Estadu ne’e sei frajil tanba instituisaun Estadu seidauk kumpre didi’ak sira-nia funsaun,” nia hateten
Jornalista : Nelson de Sousa
Editór : Cancio Ximenes

