Xefe OIM-PPN diskute enkuadramentu legál foun regula rekrutamentu ajénsia
DILI, 19 outubru 2022 (TATOLI)—Xefe Misaun International Orgnaziation for Migration (IOM) iha Timor-Leste, kuarta ne’e, hala’o sorumutu ho Prezidente Parlamentu Nasionál (PPN), Aniceto Guterres, hodi diskute kona-ba enkuadramentu legál foun iha regulamentu ajénsia rekrutamentu iha Timor-Leste.
Xefe Misaun IOM iha Timor-Leste, Aishath Ihma Shareef, hateten objetivu hosi sorumutu ne’e atu buka kuadru legál ne’ebé di’ak hodi regula rekrutamentu ajénsia sira timoroan sira servisu iha rai-li’ur.
“Kuadru legál foun ida iha kontrolu ba ajénsia rekrutamentu ne’e importante tebes atu proteje direitu traballadór Timoroan sira-nian iha rai-li’ur,” nia dehan ba jornalista sira iha Parlamentu Nasionál, kuarta ne’e.
Nune’e, nia dehan, IOM prontu atu apoia Parlamentu Nasionál Timor-Leste hodi kria kuadru legál foun atu proteje traballadór timoroan sira no regulariza rekrutamentu ajénsia ba traballadór timoroan atu ba rai-li’ur.
Prezidente Parlamentu Nasionál sei foti medida iha tempu badak nia laran relasiona ho enkuadramentu legál foun atu asegura protesaun direitu traballadór sira-nian.
Ihma Shareef hateten, servisu IOM nian mak atu asegura mobilizasaun traballador Timoroan sira iha estranjeiru tuir regra sira no fó protesaun ba traballadór sira iha estranjeiru.
Iha sorumutu ne’e, ko’alia kona-ba mobilizasaun traballadór timoroan sira iha rai-li’ur, tanba ne’e ezisténsia OIM nian iha Timor-Leste sei koopera ho Ministériu Negósiu Estranjeiru no Kooperasaun (MNEC, sigla portugés), Ministériu Interiór no Ministériu Justisa Timor-Leste.
Jornalista : Osoria Marques
Editór : Cancio Ximenes
