PR Horta-Alta Entidade Reinu Kamboja analiza situasaun mundiál-rejionál
DILI, 19 outubru 2022 (TATOLI)—Prezidente Repúblika Kuarta-feira ne’e, hasoru malu ho Primeiru-Ministru Reinu Kamboja, Vise Xefe Estadu Maiór Forsa Armada, Jenerál Komponente Terrestre Reinu Kamboja, Tenente Jenerál Hun Manet no emprezáriu balun.
“Hanesan enkontru infomál ida, troka impressun no sira hakarak rona ha’u nia apresiasaun no análiza konabá situasaun mundiál liu-liu Ukránia no polítika Amerikanu no relasaun Timor-Leste nian” Xefe Estadu, José Ramos Horta hateten liuhosi komunikadu imprensa ne’ebé Agência Tatoli asesu, kinta ne’e.
Tuir Xefe Estadu, Primeiru-Ministru Kamboja Hun Sen apoia tebes adezaun Timor-Leste ba ASEAN no envolvimentu Timor-Leste iha organizasaun rejionál ne’ebé kontribui liután diplomasia ho nasaun seluk no kontribui ba rezolusaun problema iha Myanmar.
“Bainhira Timor-Leste tama ASEAN sei kontribui makaas ba diplomasia kona-ba situasaun iha Myanmar, iha kontestu ASEAN atu haree oinsá kontribui hodi hetan solusaun tanba, bainhira kontinua, sei afeta ba ASEAN nia kreadibilidade,” Horta dehan.
Prezidente Horta mós rekorda sofrimente líder no povu Myanmar, tanba ne’e promete atu hametin parseria ho ASEAN hodi solusiona konflitu liuhosi dalan diálogu.
Vizita Xefe Estadu ba Kamboja ne’e hahú hosi 19 to’o 21 fulan-outubru, hanesan resposta ba konvite hosi Liurai Reinu Kamboja, Narodom Sihamonia, hodi hametin relasaun bilaterál ho Timor-Leste.
Jornalista : Osória Marques
Editór : Cancio Ximenes
