iklan

EDUKASAUN

Estudante 5 de maiu 390 sei uza sala ESTV hodi tuir ezame nasionál

Estudante 5 de maiu 390 sei uza sala ESTV hodi tuir ezame nasionál

Estudante sira realiza ezame nasionál. Imajen Jogerjo Guterres

DILI, 21 outubru 2022 (TATOLI)–Estudante finalista 390 hosi Ensinu Sekundáriu Jerál (ESJ) 5 de maiu sei uza sala 10 iha eskola Ensinu Sekundáriu Tékniku Vokasionál (ESTV) ekonomia komérsiu Bekora hodi tuir ezame nasionál iha segunda, 24 outubru 2022.

Adjunta Diretór Eskola ESJ 5 de maiu Bekora, Maria dos Santos, hateten estudante na’in 390 tenke tuir ezame nasionál iha eskola ESTV ekonomia komérsiu tanba meiu iha eskola 5 de maiu atu akumula estudante finalista hamutuk na’in 784 la sufisiente.

“Ita halo konfirmasaun ho parte dirijente sira iha eskola ekonomia komérsiu, ne’ebé sira aseita ona ita bele uza sira nia sala 12 durante semana ida hodi realiza ezame nasionál no ezame lokál ba estudante na’in 390 ne’e”, Maria dos Santos hateten ba Tatoli iha eskola 5 de maiu Bekora, sesta ne’e.

Adjunta ne’e katak sala 12 ne’ebé parte eskola 5 de maiu sei utiliza, kompostu hosi sala 10 sei uza hosi estudante finalista departamentu siénsia sosiál no teknolojia hodi tuir ezame nasionál no ezame lokál, sala rua profesora sira sei uza hodi halo verifikasaun.

Apoiu liña koordenasaun entre eskola rua ne’e maka hahú sábadu parte eskola 5 de maiu Bekora komesa halo ona vijilánsia ba sala 12 ne’e hodi hahú taka ona númeru ezame estudante sira no mós prepara ona apoiu seguransa.

Estudante finalista hosi departamentu siénsia sosiál umana hamutuk 391 kontinua mantein iha eskola ESJ 5 de maiu Bekora hodi tuir ezame nasionál.

Adjunta ne’e informa eskola 5 de maiu kontinua enfrenta difikuldade ho sala aula tanba númeru estudante aumenta kuaze 2.050. Daudaun ne’e sira iha de’it sala 14, maibé parte eskola tenke fahe ba turma tolu, tanba estudante barak liu, sira fó espasu ba estudante sira hodi bele simu matéria ho di’ak.

Notísia relevante: Eskola ESJ 05 maiu menus espasu ba estudante finalista partisipa ezame nasionál

Jornalista       : Tomé Amado

Editora           : Rita Almeida

iklan
iklan

Leave a Reply

iklan
error: Content is protected !!