DILI, 21 outubru 2022 (TATOLI)–Ekipa inspesaun edukasaun nasionál hosi Ministériu Edukasaun, Juventude no Desportu (MEJD) investiga ona estudante na’in 10 hosi eskola Ensinu Sekundáriu Jerál (ESJ) 5 de maiu Bekora hamutuk ho sira nia aman relasiona ho diploma falsa.
“Kinta foin lalais ne’e ita-nia inspetór jerál ho ekipa bolu ona estudante na’in 10 ho sira-nia inan aman hodi halo investigasaun”, Adjunta Diretór ESJ 5 de maiu Bekora, Maria dos Santos, ba Tatoli iha ninia servisu fatin, sesta ne’e.
Adjunta hateten prosesu investigasaun ne’e hetan ona deklarasaun hosi estudante na’in 10, katak sira sosa diploma hosi pesoál balun. Maske nia la informa ema nia naran no folin diploma nian maibé notísia antes haktuir, kada estudante ida selu $60.
“Ita-nia estudante sira ne’e deklara hotu ona, sira sosa diploma hosi sé, naran iha hotu ona inklui folin hira mós ita-nia estudante sira hateten hotu ona iha deklarasaun ne’e, agora entrega hotu ona ba inspesaun nasionál atu halo kontinuasaun ba prosesu investigasaun tuir mai”, tenik nia.
Parte eskola, nia hatutan entrega direta ba MEJD rezolve, hodi foti desizaun, tanba estrutura atuál laiha responsabilidade ba kazu refere.
Ezame nasionál ba estudante désimu segundu anu sei komesa iha segunda 24 outubru 2022, maibé parte eskola seidauk bele distribui kartaun ezame ba estudante na’in 10 ne’e tanba seidauk hetan desizaun ida hosi ministériu.
Notísia relevante: DSED identifika estudante ESJ na’in 10 utiliza diploma falsa
Jornalista : Tomé Amado
Editora : Rita Almeida
