AMD hasai ona negosiante faan karreta iha kaza Europeia oin

DILI, 22 outubru 2022 (TATOLI)—Xefe Departamentu Jestaun no Merkadu iha Autoridade Munisípiu Dili (AMD), Gaspar da Silva informa, Autoridade Munisípiu Dili liuhosi Dirasaun Jestaun no Merkadu iha sesta ne’e hasai ona negosiante faan karreta iha área Kaza Europeia nia oin ne’e.
Notísia Relevante: AMD sei muda negosiante faan karreta iha estrada públiku

“Ba negosiante sira-ne’ebé faan karreta tanba sira iha reseita, entaun tuir lei ba emprezáriu sira, sira tenke iha rai própriu atu bele halo negósiu, labele ba faan fali iha fatin públiku sira. Tanba ne’e, Autoridade Munisípiu Dili iha kompeténsia atu bele kontrola ba areadór sira-ne’ebé iha fatin públiku hanesan trotoar leten no iha jardin sira, ida-ne’e ita presiza atu kontrola. Tanba ne’e, horisehik negosiante sira faan karreta iha Kaza Europeia nia oin hamamuk ona fatin no ami mós horisehik halo avizu katak hosi área tasi ibun hosi Largo Lecidere to’o rai kotuk ba negosiante sira-ne’ebé faan karreta no motor ne’e labele faan iha fatin ne’e,” Gaspar da Silva hateten ba Agência Tatoli, liuhosi telefónika, sábadu ne’e.
Iha segunda semana oin, Dirasaun Jestaun no Merkadu sei halo kontinuasaun no sei foti medida hadi kontrola nafatin, mai se negosiante sira sei faan nafatin iha fatin sira-ne’e mak Dirasaun Jestaun no Merkadu sei halo hamutuk ho Polisia Tranzitu atu fó poder ba polisia sira atu foti medida.
“Tanba ne’e, hanesan sidadaun ne’ebé la obedese ba dekretu-lei, entaun ita tenke fó sansaun ba sira mak liuhosi prosesu tilang, atu nune’e sira bele selu multa. Signifika sira ulun fatuk toos, sira tenke kontribui ba Estadu,” nia dehan.
Entaun nehosiante faan motor no karreta ne’ebé halo atividade negósiu iha estrada públiku ne’e faan fali iha ne’ebé, nia hatán, ida-ne’e Autoridade Munisípiu Dili liuhosi Dirasaun Jestaun no Merkadu labele deside tanba uluk negosiante sira halo atividade negósiu iha área Caicoli no halo akordu ho Prezidente AMD sesante katak karik aban-bainrua Estadu presiza rai iha área Caicoli atu halo fali buat ruma, sira tenke prontu husik voluntáriamente atu ba buka fatin seluk.
“Ida-ne’e akordu mós iha hela. Tanba ne’e, Autoridade Munisipiu Dili, liuhosi Dirasaun Jestaun no Merkadu husu ba negosiante sira atu ita hotu kontribui, nune’e ita hadia sidade Dili ba futuru sai sidade ne’ebé di’ak no ita bele halo negósiu, maibé tenke tuir regra ka dalan ne’ebé di’ak,” nia apela.
Entretantu, prosesu muda negosiante faan karreta iha Kaza Europeia nia oin ne’e akontese iha sesta (21/10) horisehik, ne’ebé Autoridade Munisípiu Dili liuhosi Dirasaun Jestaun no Merkadu hamutuk ho Polisia Tranzitu mak ba hasai.
Jornalista : Nelia Fernandes
Editór : Cancio Ximenes

