OÉ-CUSSE, 22 outubru 2022 (TATOLI)–Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, sábadu ne’e, halo inaugurasaun ba projetu eletrisidade hodi fó naroman ba uma kain 118 iha bairru Paineno, aldeia Fatubijae, suku Bobokase, sub-rejiaun Pante Makasar.
“Parabéns inan-aman sira iha bairru Paineno. Ohin ba oin asesu ona ahi naroman iha ita-nia knua rasik. Ha’u hatene fatin ne’e uluk ema matenek sira mai salva an iha situasaun defisil 1999. Ohin, Governu liuhosi Autoridade RAEOA hahú lori dezenvolvimentu atu diginifika fatin ne’e, tinan 20-resin imi moris ho nakukun. Ohin, ita hotu kontente tanba hetan ona naroman iha tempu kalan. Tan ne’e, ita tenke agradese ba RAEOA tenke ba oin,” Prezidente Autoridade RAEOA hateten iha diskursu seremónia inaugurasaun ne’e.
Kontente ne’e seidauk to’o nia rohan tanba sei persiza atu harie tán fasilidade seluk, hanesan eskola, kanalizasaun bee-moos, tanba fatin ne’e izoladu dezde tempu portugés maibé agradese tanba ohin inaugura eletridadade no mós melloramentu estrada mós la’o daudaun to’o ona iha bairo ne’e.
“Ida-ne’e mak ita hotu nia hakarak. Povu tenke asesu ahi, asesu ba estrada no bee-moos. Ba oin, ita sei haree atu harii eskola no fasilidade saúde iha fatin izoladu ne’e, atu fasilita oan-sira no komunidade bele asesu ho distánsia besik,” nia dehan.
Xefe departementu EDTL iha Oé-Cusse, Armindo Mendonça, informa instalasaun ba projetu ne’e ho Médiu Tensaun (TM) kilometru tolu (3) ho Baixo Tensaun (TB) kilometru haat (4) realiza iha fatin rua.
Primeiru hahú hosi Bairru Paineno, suku Bobokase to’o bairo Maonmuti, suku Cunha ho totál populasaun ne’ebé mak atu hetan eletrisidade hosi projetu ne’e hamutuk 118 ne’ebé pertense ba sub-rejiaun Pante Makasar.
“Tuir loloos projetu ne’e entrega ba Autoridade kleur ona maibé iha fallansu kona-ba mobilizasaun ekipamentu entaun persiza tempu. Maibé, agradese ho esforsu empreza to’o ohin loron, ita hotu mai asiste halo inaugurasaun, nune’e komunidade bele hetan ona naroman,” nia hateten.
Xefe suku Bobokase, Jacob Cob, agradese ba Prezidente Autoridade RAEOA ho membru tomak, tanba iha tinan ne’e konsege rezolve ona komunidade iha fatin izoladu sira nia preokupasaun atu hetan naroman hosi eletrisidade.
“Ohin inaugura ona projetu eletrisidade iha bairru Paineno, iha bairru ne’e iha benefisiáriu hamutuk uma-kain 44. Dezde Governasaun dahuluk to’o VIII Governu, mandatu Prezidente Autoridade RAEOA, Oé-Cusse oan mak rezolve ami-nia problema iha bairru ne’e. Tan ne’e, agradese ba Autoridade RAEOA,tanba hanoin no fó tulun ona ha’u-nia komunidade iha bairru Paineneo atu hetan naroman iha fatin izoladu ne’e,” nia dehan.
Entretantu, projetu eletrisidade ne’e ezekuta hosi empreza Uma-Oli Unipesoál, Lda, ho valór kontratu $306, 362.76, ne’ebé Autoridade RAEOA prevee hosi orsamentu Jerál Estadu (OJE) 2022 nian ho durasaun servisu fulan haat.
Jornalista : Abílio Elo Nini
Editór : Cancio Ximenes
