DILI, 25 outubru 2022 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, akompaña hosi Deputadu sira Grupu Nasionál, partisipa iha sesaun solene XI Asembleia Parlamentár CPLP iha Lisboa Portugál iha loron 24 to’o 25 fulan-outubro tinan 2022.
Tuir komunikadu imprensa ne’ebé Agência Tatoli asesu iha tersa (25/10) ne’e, haktuir tema sentrál ba reuniaun AP-CPLP ne’e mak “Livre circulação de bens e serviços no espaço da CPLP” ho prezensa hosi nasaun membru sira.
Antes hahú sesaun solene, deputadu sira halo uluk reuniaun iha komisaun sira hanesan Komisaun 01 kaer asuntu Polítika, Estratéjia, Lejislasaun, Sidadánia no Sirkulasaun; Komisaun 2 haree ba asuntu Ekonomia, Ambiente no Kooperasaun, no Komisaun 3 ne’ebe kaer asuntu kona-ba Língua, Edukasaun, Siénsia e Kultura; Reuniaun Redes de Mulheres no Jovens Parlamentares.
Asembleia Parlamentár CPLP ne’e partisipa hosi Prezidente Parlamentu sira no Xefe Delegasaun sira hosi nasaun membru sira mak hanesan Angola, Cabo Verde, Guiné-Bissau, Guiné Equatorial, Mozambique, Portugal, São Tomé e Príncipe no Timor-Leste.
Além de ne’e, partisipa mós Ministru Negosius Estranjeiru Portugal no Sekretáriu Ezekutivu CPLP, membru sira Parlamentu Nasionál no Grupu Nasionál AP-CPLP Deputadu na’in-neen (6) hanesan Deputada Maria Fernanda Lay (Bankada CNRT), Deputada Terezinha Viegas (Bankada CNRT), Deputada Gabriela Alves (Bankada FRETILIN) Deputadu Fabião de Oliveira (Bankada FRETILIN) Deputadu Francisco de Vasconcelos (Bankada PLP) no Deputadu António da Conceição (Bankada PD).
Jornalista : Nelia Fernandes
Editór : Cancio Ximenes
