DILI, 25 outubru 2022 (TATOLI)—Xefe Suku Bemori, postu administrativa Vera Cruz, munisípiu Dili, Cristalina Pereira Soares Oliveira, hateten suku Bemori submete ona fixa família 1.072 ba Autoridade Munisípiu Dili (AMD) hodi prosesa ba subsídiu $200 ba uma kain.
Notísia Relevante: MSSI hahú prodús lista pagamentu ba subsídiu $200 ba uma kain
“Ami-nia ne’e ami entrega ona ba Autoridade Munisípiu Dili no dala ruma iha ona Ministériu Solidariedade Sosiál no Inkkuzaun (MSSI) no ita hein de’it pagamentu realiza,” Xefe Suku hateten ba Agência Tatoli, iha nia knaar fatin Bemori, Dili, tersa ne’e.
Autoridade lokál ne’e hatutan, hosi totál xefe família ne’e aldeia Um iha xefe família 205, aldeia Baba Liurai Oeste xefe família 134, Bemori Sentrál iha uma kain 210, aldeia Ailele-Hun uma kain 125, aldeia Has-Laran uma kain 140, aldeia Sentru 159 no aldeia My Friend uma kain 99.
Xefe suku dehan, durante ne’e suku Bemori mós simu no rejistu tan xefe família foun hamutuk 200, maibé xefe família foun sira-ne’e mós sei hetan direitu tanba hatama hotu ona lista sira-ne’e ba iha parte relevante sira.
Baze fundamentál atu fó subsídiu $200 uma kain ne’e hosi Dekretu-Lei númeru 37/2022 ne’ebé hateten katak subsídiu hosi Estadu ne’e ba uma kain sira hotu iha Timor-Leste no désimu terseiru ne’e aplika ba funsionáriu públiku de’it.
Dekretu-Lei númeru 37/2022 ne’e hateten, subsídiu ne’e sei atribui ba uma kain iha Timor-Leste. Não é bem critério maibé iha Dekretu-Lei ne’e hateten katak sé mak sai benefisiáriu ne’e mak uma kain sira-ne’ebé rejistu iha livru suku nian to’o loron 28 fevereiru 2022.
Benefisiáriu ba subsídiu $200 uma kain ba fim do ano ne’e hamutuk 339,110 ho montante $67.8.
Notísia Relevante: Subsídiu $200 ba uma kain sei lansa iha 16 novembru
Jornalista : Osoria Marques
Editór : Cancio Ximenes
