DILI, 26 outubru 2022 (TATOLI)—Estadu Timor-Leste aloka osan rihun $41 ba serimónia dezlutu no mós inaugura kampa (rate) Saudozu Max Stahl ne’ebé sei realiza iha 28 fulan-outubru tinan ne’e.
Notísia Relevante: Governu aloka kuaze $30.000 ba serimónia dezlutu saudozu Max Stahl-Sebastião Gomes
Prezidente Komisaun Organizadór, Rogerio Castro da Cruz informa, preparasaun ba dezlutu Saudozu Max Stahl, hanesan mós loron saudozu Sebastião Gomes nia mate ne’ebé komisaun mai informa ba Xefe Estadu husu prezidente atu ba partisipa mós oráriu ne’ebé komisaun prepara.
“Orsamentu ba selebrasaun kuaze rihun $41 ida, maibé saida mak komisaun nia mehi la atinje. Maibé ami iha vontade tomak bele fiar katak buat hotu sei la’o ho susesu,” Prezidente Komisaun Organizadóra Serimónia Dezlutu Saudozu Max Stahl ne’e hateten hafoin hasoru malu ho Prezidente Repúblika, José Ramos Horta, iha Palásiu Prezidensiál Nicolau Lobato, Bairu Pite, kuarta ne’e.
Nia hateten, Xefe Estadu simu no sei koloka tempu mak Xef Estadu rasik termina no nia entuziamu tebes, nune’e komisaun mós agradese katak sei fila-fali ba bainhira, hafoin sei halo planu ne’ebé di’ak liután.
Serimónia dezlutu Saudozu Max Stahl nian, sei iha atividade oioin ne’ebé mak preparadu ona hosi komisaun organizadóra, no sei konvida hotu juventude no populasaun sira atu hola parte iha atividade iha loron 27 ne’ebé hahú ho reflesaun.
“Atividade sira-ne’ebé komisaun prepara mak iha 27 outubru, ita sei hahú reflesaun kalan, aumesmu tempu ita halo animasaun kulturál iha Igreja Motael ninia oin. Ia 28 outubru, halo misa lorokraik iha Igreja Motael, depois ita halo long Marc hosi Motael ba Santa Cruz hodi inaugura saudozu Max Stahl nia kampa (rate) ne’ebé mak Governu konstrui ona. Ita karik ai-funan hotu, sei fila-fali mai iha CMSTL, saudozu ninia fatin, iha muzeu da rezisténsia nia oin,” nia dehan.
Entretantu, enkontru ho Prezidente Repúblika José Ramos Horta ne’e, Xefe Estadu hatán ba konvite hosi Prezidente Komisaun Organizadór nian no sente haksolok tanba iha komisaun ida-ne’ebé preparadu, atu nune’e bele selebra loron dezlutu saudozu Max Stahl nian ho di’ak.
Maske saudozu Max Stahl ema ne’ebé mai hosi li’ur maibé nia ema ida fó nia vida tomak, sai tan sidadaun Timor-Leste, no nia vida tomak fila fali mai Timor-Leste, ida-ne’e mak buat ida-ne’e úniku tebes.
Xefe Estadu sei partisipa serimónia dezlutu saudozu Max Stahl nian no sei konta istória Saudozu Max Stahl nian, ne’ebe iha momentu Saudozu Max Stahl to’o iha Timor hala’o nia kna’ar no mós ba iha ai-laran hodi hasoru líder FALINTIL sira.
Notísia Relevante: KDMS informa ba SEJD kona-ba preparasaun serimónia dezlutu Max Stahl
Jornalista : Osoria Marques
Editór : Cancio Ximenes
