DILI, 26 outubru 2022 (TATOLI)— Portavós Komandu Jerál Polisia Nasionál Timor-Leste (PNTL), Superintendente Xefe Arnaldo de Araújo, klarifika karta notifikasaun ne’ebé Servisu Investigasaun Kriminál Nasionál (PNSIK) ba Jornál Diáriu INDEPENDENTE atu Jornalista ho Xefe Redasaun,mai halo klarifikasaun no fortifika notisia rua ne’ebé públika, la’ós atu kriminaliza obra jornalístiku.
Portavós Superintendente Xefe Arnaldo de Araújo hato’o relasiona ho karta notifikasaun ho númeru ofísiu 112/Gab/CHEFE/SIC/PNTL/X/2022, ba Jornal Diáriu INDEPENDENTE ho nia sentidu urjente ne’e atu Jornalista Domingos Gomes ho Xefe Redasaun, Jorginho Dos Santos, tuir kódigu prosesu penál ho artigu 53, tanba deskonfia envolve krime.
Notísia relavante:TLPU ezije komandu PNTL anula karta notifikasaun ba Independente
“Notifikasaun ne’e atu Jornalista ho Xefe Redasaun mai fó de’it klarifikasaun hodi hakle’an, tanba iha momentu ne’ebá, Komandante Jerál iha hela li’ur, Segundu Komandante maka subtitui hanesan Komandante Jerál maka ko’alia iha Komandante Jerál nia fatin fó deklasaun iha media se karik koalia, ou lae?, tanba ne’e PNTL notifika hodi bolu mai fortifika de’it informasaun saida maka jornalista hakerek iha titulu jornál nian”, hateten Superintendente Xefe Arnaldo de Araujo ba jornalista sira liuhosi konferénsia Imprensa iha Komandu PNTL-Caicoli, kuarta ne’e.
Nia dehan, notifikasaun ne’e la’os kriminaliza produtu jornálistiku, maibé atu mai kumpre notifikasaun ne’e hodi fó de’it informasaun laiha buat seluk.
“Husu ba jornalista sira laran luak mai de’it bá, mai fó de’it informasaun la’ós mai atu kriminaliza ita bo’ot sira la’e”, katak nia.
Tuir Komandante Arnaldo katak, kuandu hirak ne’ebe maka temi iha notifikasaun la kumpre ne’e parte Komandante PNSIK maka sei hatene tanba sira maka hasai notifikasaun.
“Ita sidadaun hotu-hotu tenke mai kumpre notifikasaun no notifikasaun ne’e la signifka katak ita komete ona krime, maibé ita bo’ot sira mai atu fó informasaun de’it hodi klarifika de’it tuir notifikasaun ne’ebe maka fó ona ba”.
Tanba, iha notifikasaun ne’e seidauk konsidera produtu ne’ebé jornalista hakerek bele dehan krimi ka la krime.
“ Notifikasaun ida ne’e ha’u hanoin hanesan Komandante Jerál koalia ho ha’u horseik katak, notifikasaun laos konsidera hanesan krimi ida, maibé jornalista sira mai fó de’it deklasaun saida maka jornalista hakerek iha titulu notisia ne’e,” Portavós Komandu Superintendente Xefe Arnaldo de Araujo afirma.
Nia dehan, notifikasaun ne’e sai hosi Komandu Jerál PNTL liuhosi Servisu Investigasaun Kriminál Nasionál, iha asinatura maibé momentu ne’e Komandante maka la tau karimbo.
Tanba Koomandante Servisu Investigasaun Kriminál Nasionál sai hela ba Lautém entaun delega de’it nia segundu Komandante Servisu Investigasaun Kriminál hodi hasai notifikasaun no karta ne’e konsidera ofisiál duni.
“Ha’u hanoin karta notifikasaun ne’e sai duni hosi komandu PNTL, hosi investigasaun Kriminál”, Portavós Komandu Jerál PNTL, Superintendente Xefe Arnaldo de Araujo.
Hatan kona-ba, Komandu PNTL retira ka mantein notifikasaun ba jornalista sira, Komandante Arnaldo hateten ne’e depende ba Komandante PNSIK mak sei haree ida ne’e tanba nia-mak iha kompeténsia haree kona ba kestaun ne’e.
“Ha’u mai hato’o de’it saida maka parte Komandante Jerál fó hateten ba nia atu hato’o ba jornalista kona-ba notifikasaun,” nia akresenta.
Notísia relavante:CI konsidera komandu PNTL tenta kriminaliza produtu jornalizmu
Jornalista: Natalino Costa
Editór : Florencio Miranda Ximenes
